Atualità

L’agricoltöra biologica, la coltivaziun di terać y le sterne coltöra sarà al zënter de dui apuntamënć, trami dui en jöbia, ai 7 de agost dl 2014 cun i esperć dl setur dl Zënter de Sperimentaziun dla Laimburg y dla Fondaziun E. Mach de San Michael sön l’Adige. Al gnarà presentè les inrescides plü atuales sön la tematica dla coltivaziun biologica de früć y la viticoltöra biologica.

Le Parch Natural de Fanes-Senes-Braies vëgn vijité dandaldöt ti mëisc da d’istè: de chësta tematica y de co miorè i azesc al Parch à baié da püch l’assessur Richard Theiner cun i responsabli dl Parch Natural tratan na vijita a Al Plan de Mareo.

La nota positiva dl iade dl Presidënt dla Provinzia, Arno Kompatscher, incö (31/07) a Roma é stada l’eleziun de Sergio Chiamparino sciöche Presidënt dla Conferënza dles Regiuns. Le Presidënt dla Provinzia ne s’à indere nia mostrè contënt dla proposta sön na spartiziun nöia dles finanzes danter le Stat y la Provinzia: „La proposta presentada incö dal Govern é inazetabla“, à dit Kompatscher.

128 museums, coleziuns y posć d’esposiziun vëgn presentà te na brosciüra nöia, ajornada y che vëgn dada fora dala Repartiziun Museums. Tla publicaziun nöia pon ciafè dötes les informaziuns ütles sön orars de daurida, numers de telefon, misciuns email, adresses y de cörtes descriziuns sön i museums. La brosciüra nöia gnarà tosc partida fora debann ti museums y ti ofizi por le turism.

La Junta provinziala s’incuntarà por la sentada edemala en mertesc, ai 5 de agost, por spo daldô avëi na palsa de döes edemes zënza sentades. La proscima sentada dô Santa Maria dai Ciüf é preodüda por en mertesc, ai 26 de agost.

„La familia é dialogh“: Chësta é stada la tematica cun chëra che l’assessuria por la familia, Waltraud Deeg, à invié rapresentanć de uniuns y organisaziuns che se crüzia dles families, a na seria de incuntades. I resultać de chëstes incuntades y discusciuns gnarà presentades dal’assessuria en lönesc, ai 4 de agost, tratan na conferënza stampa tla scolina de St.Johann a Balsan

Dala sentada, che é stada dan da püch, dl organism à l’assessur provinzial Arnold Schuler rengrazié i componënć dl vedl Consëi d’aministraziun dl’Aziënda provinziala bosć y demane, menada agn alalungia da Luis Durnwalder, che se crüziâ di raiuns da munt y di bosć dla Provinzia.

L’assessur por i laûrs publics Christian Tommasini y l’assessuria por la sanité Martha Stocker, à fat inier, mertesc ai 29 de messè, n suralüch al cantier dla tlinica nöia de Balsan. Ai é gnüs acompagnà dai funzionars dl’Aziënda Sanité, dai tecnics y dai responsabli di laûrs. Atualmënter vëgnel laurè a n ampliamënt y a na restrotoraziun dl ospedal da Balsan.

Frabicat nü o ressanamënt dl frabicat esistënt dla scora mesana de Urtijëi: chësta tematica é stada al zënter dl’incuntada da incö (mertesc, ai 29 de messè) danter l’assessur por i Comuns Arnold Schuler y na delegaziun de rapresentanć da Urtijëi.

Na scora alta cun n orientamënt europeich: chësta é la proposta dla scora tlassica „Beda Weber“ de Maran che é gnüda portada dant incö (mertesc, ai 29 de messè) dal assessur por la scora todëscia Philipp Achammer. La Junta provinziala à garantì so sostëgn al proiet.