Atualità

Les cater sozietês provinziales che atualmënter pîta sorvisc por l’economia gnarà metüdes adöm: chësta dezijiun à tut incö (mertesc ai 29 de messè) la Junta dla Provinzia. La ragrupamënt te öna na sozieté é gnüda laorada fora dai proprietars dles sozietês, la Provinzia y la Ćiamena dl Comerz.

L’atestat de bilinguism (y trilinguism) sarà un di criters fondamentai por les bandides de concursc por i sorvisc scrić fora dala Provinzia: daimpröma sciöche critêr cualitatif, daldô sciöche critêr d’estlujiun. Chësta dezijiun é gnüda tuta incö (mertesc, ai 29 de messè) dala Junta dla Provinzia.

Le conduziun de proieć, mesi de comunicaziuns moderns y la cronica de n’uniun: Por düć chi che é a će de n’uniun y che foss interessà da la condüje te na manira ćiamò plü profescionala ti vëgnel pité n curs de perfezionamënt, organisé dal Ofize Chestiuns de cabinet y dal’organisaziun dles Universitês popolares dl Südtirol. Le curs mët man ai 26 de setëmber, le lingaz d’insegnamënt é le todësch.

Da püch à zitadins cun la ponsiun minimala la poscibilité da ciafè n contribut provinzial por les spëises secundares sön l’abitaziun: chësta dezijiun é gnüda presentada inier (ai 28 de messè) a Balsan dal’assessuria Martha Stocker y dai sindacać, patronać y dales federaziuns por jënt atempada. Evënć d’informaziun por les porsones interessades gnarà organisà ai 2 y ai 9 de setëmber.

Incö, lönesc ai 28 de messè, dales 12 da misdé él scadü l’ultimo terminn por dè jö la domanda por se candidé por un di posć plü alć dl’aministraziun publica: chël por deventè diretur general o direturia generala. „Indöt él rové ite 60 candidatöres y les poscibilitês che i sunse bugn da ciafè na porsona competënta é altes “, à dit l’assessuria por l’aministraziun publica Waltraud Deeg.

La sconanza di bëgns culturai é stada la tematica zentrala tratan l’incuntada danter l’assessur provinzial competënt Florian Mussner y Waltraud Kofler Engl, nominada da püch dala Junta provinziala sciöche direturia nöia dla Repartiziun Bëgns Culturai.

I ntervënc de slargiamënt dla streda statela te Gherdëina SS 242 tl chemun de Laion ie finei. Dala 10.00 da ncuei, vënderdì 25 de lugio, ie la streda inò davierta per l trafich y n possa furné lessù te tramedoi direzions.

Plü segurëza tratan i iadi, informaziuns ajornades vigni dé, anuzamënt plü saurì di sorvisc pità: chisc é i obietifs primars dl’unificaziun dla Zentrala Viabilité cun le sorvisc dl Info-Mobilité. L’assessur provinzial Arnold Schuler à presentè incö (25 de messè) l’incorporaziun di dui sorvisc te öna na Zentrala che arà la sënta tla Repartiziun Proteziun cuntra le medefüch y Proteziun zivila.

Tl Südtirol él gnü fat indöt 240 chilometri de strades por rajuns militares. La storia dles strades y sües particolaritês é al zënter de na publicaziun nöia dal titul „Itinera“. Le liber nü é gnü presentè incö (ai 24 de messè) a Balsan dal assessur por le patrimone Florian Mussner.

L’app "Meteo Südtirol" ativada da zirca un n mëis, é bele gnüda desćiariada feter 50mile iadi y é bele danter chëres plü adorades tl Südtirol. Ajornamënć por talian, todësch, ladin y inglesc. L’app é desponibla debann por android y iOS (iPhone).