Atualità

Vigni ann vëgnel organisé por studënć y academics practicums pro i ofizi dla Provinzia a Roma y Bruxelles. Por fà para al concurs val debojëgn da dè jö la domanda pro l’Ofize Assunziuns Personal. An po fà domanda ćina ai 31 de messè dl 2014.

Da en lönesc, ai 21 de lugio, ćina en sabeda, ai 2 d’agost, romagn la biblioteca provinziala dla “Teßmann” stlüta porvia de laûrs interns. Defora de chëstes does edemes romagn la biblioteca tres daverta d’isté dales 09.00 ales 19.00, les sabedes de lugio y agost indere tres dales 09.00 ales 12.30.

Indöt investësc la Repartiziun Costruziuns idrauliches 390.000 euro por la costruziun de proteziuns cuntra l’ega alta dl rü d’Al Plan tla zona artejanala “Möbel Mareo” tl Comun de Mareo. Inier, lönesc ai 14 de messè, à l’Ofize sistemaziun de rüs de munt y paralovines ost dla Repartiziun Costruziuns idrauliches metü man cun i laûrs de costruziun de mürs de proteziun.

I posć de rodul y i cuntrać a termo al personal insegnant vëgn assegnà ai 7 de agost tl’Intendënza ladina a Balsan. I posć tles scores de musiga todësces y ladines vëgn indere assegnà ai 6 de agost tla Repartiziun Personal (Palaz Provinzial 8).

L’assessuria provinziala Martha Stocker s’à incuntè da püch cun i direturs dla Caritas tla sënta a Balsan por s’informè sön l’ativité dl’assoziaziun.

Chësta edema ne saràl degöna sentada dla Junta provinziala, la proscima sentada danter le Presidënt dla Junta y i assessurs provinziai é insciö preodüda por le mertesc dla proscima edema, ai 22 de messè. Por chësta rajun ne gnaràl indoman gnanca tignì la conferënza stampa do la sentada dla Junta.

Incö vëndres, ai 11 de messè à presentè l’assessur por la scora ladina Florian Mussner y l‘intendënt por la scora ladina Roland Verra tratan na conferënza stampa a Balsan i resultać dl ann scolastich 2013-14 tles scores ladines. La conferënza stampa de presentaziun é gnüda tignida adöm cun l’assessur por la scora todëscia Philipp Achammer y l’assessur por la scora taliana Christian Tommasini.

En vëndres ai 18 de messè dales 6 da sëra vëgnel daurì tl Museum Ladin Ćiastel de Tor a San Martin la mostra temporanea "Le cör dla ćiasa- La stüa tla Val Badia", dedicada al svilup y al significat dla stüa che é stè por secui le cör dla ćiasa ladina. Ala inauguraziun gnaràl i curadus dla mostra y l’assessur ai Museums Florian Mussner.

L’insegnamënt de na materia scolastica te n lingaz forest, che é gnü esperimentè dal 2011 inant tles scores altes ladines, é gnü aprovè inier, mertesc ai 8 de messè, dala Junta provinziala.

Por l’urbanisaziun de zones industriales él preodü da śëgn inant indô la conzesciun de contribuć. Chësta dezijiun à tut incö (ai 8 de messè) la Junta provinziala, che à inće tl medemo tëmp stabilì i critêrs por l’assegnaziun dl sostëgn. Contribuć gnarà ma plü conzedüs por l’urbanisaziun primara dles zones, plü sostëgn él indere preodü por zones industriales innovatives o sura-comunales.