Atualità

La Junta provinziala sostëgn le mioramënt dla situaziun economica inće cun investimënć tl ćiamp dles infrastrotöres. Incö (ai 8 de messè) à la Junta provinziala aprovè le program por les operes publiches, na spëisa che prevëiga l’investimënt anual de 52 milinus de euro ćina le 2018. Implü él gnü definì les prioritês por la proteziun cuntra la tomada de peres.

Le parch technologich a Balsan gnarà fat sö, “y chësc cun l’aiüt de düć i seturs y dötes les organisaziuns dl’economia”. Chësta la notizia che le Presidënt dla Junta Arno Kompatscher à dè incö (ai 8 de messè) do la sentada dla junta provinziala y do n’incuntada cun düć i rapresentanć dl’economia inier da sëra. Le moto dla costruziun y dl auzamënt nü sarà: Manco publich, plü privat.

La Junta Provinziala à aprovè n program finanziar cun de plü mosöres finanziares por ti dè n impuls al’economia. Öna dles mosöres zentrales é la diminuziun dl’alicuota dl IRAP dal 2,88 porcënt al 2,78 porcënt. Intratan él inće gnü registré na gran domanda do les antizipaziuns sön le ressanamënt dla pröma ćiasa.

I proscimi ejams por deventè iagri gnarà tignis a San Laurënz dai 14 ćina ai 17 de otober y a Maran-Obermais dai 21 ćina ai 24 de otober. Les domandes por l’iscriziun mëss gnì dades jö cun n formular cun n martl da bol da 16 euro y cun le numer de telefonn ćina al plü tert ai 29 de agost al Ofize Ćiacia y Pëscia tl palaz provinzial 6, strada Brenner 6, a Balsan.

Sciöche te vigni setur él inće preodü tl setur dl sport mosöres de sparagn, mo por podëi impò finanzié inant l’ativité y le funzionamënt dles uniuns dl sport él gnü aprovè inier (ai 7 de messè) dal Consëi provinzial por le sport na reorganisaziun di contribuć cun chëra che l’ativité dles uniuns podarà gni garantida.

L’ass.a provinziala Martha Stocker y la presidënta dl Consëi provinzial por l’avalianza dles chances Oberhammer à presentè ai 7 de lugio, a Balsan n program de diesc punć, l’ediziun nöia de „ëres“ y la relaziun d’ativité dal 2009 al 2013. „I ùn fat n gran vare inant por ći che reverda l’avalianza dles chances, inće por mirit dl laûr de coliamënt cun les organisaziuns y uniuns", à dit Stocker.

Acompagné dal Presidënt dla Junta Arno Kompatscher y dal minister por les Infrastrotöres Maurizio Lupi à le Presidënt dl Consëi di Ministri Matteo Renzi vijité incö (05/07) le cantier dl tunel de basa dl Prener BBT a Mauls. “Chilò vegnël fat sö n tunel por lié adöm dui raiuns“, à dit Renzi y à inće definì le BBT sciöche n proiet che fajarà la storia dl injinieria.

Autoritês de livel alt y segnai tlers: Nia ma i chefs dl govern Matteo Renzi y Werner Faymann, mo inće i trëi Presidënć dles provinzies Arno Kompatscher, Günther Platter y Ugo Rossi à dè incö (5 de messè) tratan le convëgn de Ćiastel Prösels a Fié segnai tlers por na maiù colaboraziun danter les regiuns tl‘Europa y por n renforzamënt dles regiuns por le proiet d’integraziun europeich.

Le dagnì dles regiuns tl’Uniun Europeica, les poscibilitês dl’Euregio, la funziun dl Südtirol y la pert desvalia dles istituziuns politiches regionales, statales y europeiches: Chëstes é stades les tematiches dl discurs dl Presidënt dla Provinzia Arno Kompatscher tratan la daurida dl convëgn europeich incö (4 de messè) a Ćiastel Prösels a Fié.

Cun l’incuntada al 1. de messè ti urć de Ćiastel Trauttmansdorff é rové le “Dé di paurs“ chësc ann bele ala sesta ediziun. Fat para à indöt 180 titolars dles aziëndes da paur “Roter Hahn” che à insciö podü dé n’odlada da plü daimprò al’ativité turistica tratan la sajiun da d’isté a Maran.