Atualità

Dal 2011 inant à l’Agenzia dles entrades scrit fora de plü concursc por l’assunziun de personal, zënza avëi mai preodü l’aumënt de posć te Südtirol. Śëgn gnaràl inće scrit fora 30 posć tl Südtirol. Chësc é gnü anunzié dan da püch dala secreteria provinziala dla SGBCisl Agnes Haller y dal’assessuria por le laûr Marth Stocker. “Finalmënter à les bries de agn alalungia portè sü früć”, dij Stocker.

Ot é i morins restrotorà tla “Val di murins” a Lungiarü che vëgn anuzà ćiamò al dedaincö en pert dai paurs dl post y che é devëntà cun le passè dl tëmp inće n’atraziun por i ghesć interessà ala cultura da paur da zacan y d’al dedaincö.

Le raport dl’oferta formativa dles scores profescionales cun l’economia y le marćé dl laûr, les poscibilitês por na promoziun individuala tres i zëntri de formaziun y la formaziun di lerneri: chëstes é stades les tematiches tratades da püch tratan na incuntada danter l’assessur por la formaziun Philipp Achammer y i rapresentanć di zëntri dla formaziun profescionala.

I laûrs por l’ampliamënt dla strada statala de Gherdëna SS 242, danter le chilometer 3+230 y le cm 3+400 tl comun de Laiun, à arjunt n bun punt y la strada po insciö gnì daurida al trafich da incö, mercui ai 25 de jügn, dales 6 da sëra inant. Ćina la fin di laûrs podaràn passè tres sön öna na pert dla strada cun la prezedënza alternada.

Inier (24 de jügn) à na comisciun de storics che laôra dal 2011 incà por porvè da identifiché les porsones sopolides tratan l’epoca dl nazism tla tlinica psichiatrica de Hall tl Tirol, presenté süa relaziun finala. “Danter les 228 porsones sopolides nen él 46 che vëgn dal Südtirol”, dij la direturia dl Archif provinzial Christine Roilo, che fej pert dla comisciun di storics.

Le proiet suraregional “Violënza tla vedla eté” danter Tirol y Südtirol gnarà stlüt jö en mertesc ai 1 de messé cun n convëgn tla Université de Balsan. Tratan la daurida gnaràl portè dant dales döes assessuries por la sanité Martha Stocker y Bernhard Tilg (Tirol) i resultać dl proiet.

Tl Museum Ladin Ciastel de Tor a San Martin ie la geologia y la storia dla furmazion dla Dolomites tl zënter uni merdi dai 1 de lugio ai 2 de setëmber. Danmesdì possa la/i vijitadëures analisé pieres y fossii locai, domesdì pieta l Museum n culaborazion cun l Ufize parcs naturei na jita meneda sun l troi geologich de Sas de Putia. L ie de bujën de se prenuté.

Ćiarè do ales previjiuns dl tëmp te Südtirol devënta tres plü saurì: insciö n’él nia ma gnü amplié da pert dl Sorvisc meteo dla Provinzia la plata internet cun na verjiun mobila por zelulars, mo da śëgn inant pon inće lì do les previjiuns dl tëmp cun l’app nöia „Meteo Südtirol“.

Le museum storich – cultural de Ćiastel Tirol vëgn inserì tl’Aziënda museums provinziai: chësta dezijiun à la junta provinziala tut incö, mertesc ai 24 de jügn. Cun chësta mudaziun podaràl gnì scemplifiché tl dagnì les prozedöres aministratives y la gestiun unitara di museums provinziai. Implü él inće gnü aprovè le program por le svilup rural 2014/2020

La junta provinziala à aprovè incö (mertesc ai 24 de jügn) indöt 13 miliuns de euro por finanzié i stipendiums por studënć por le proscimo ann academich. L’ultimo dé por presentè les domandes por n stipendium é ai 31 de otober.