Atualità

USP - Deplü esperć dai Paîsc Todësch, dal’Austria, da Südtirol y dala Svizera s’à incuntè da püch por s’ajornè sön i svilups atuai tl setur dla migraziun y dla scora te döta l’Europa, inće pro ći che reverda les desfarënzies danter i cater paîsc. L’ incuntada é stada a Fribourg tla Svizera y por l`Ofize provinzial scolastich dl Südtirol à tut pert Sonja Logiudice.

USP - Aladô dla relaziun „Mobilität und Verkehr 2012“ („Mobilité y trafich 2012), publicada incö dal’Istitut provinzial por les statistiches ASTAT, él gnü registrè tl Südtirol tratan döt le 2012 indöt 24 miliuns de timbradöres sön i mesi dl trasport publich.

Informaziuns sön la situaziun contratuala, garanzies por la sconanza di consumadus, dla contrada y dla produziun: chëstes è les tematiches prinzipales dla tuta de posiziun sön la TTIP, l’acordanza comerziala che atualmënter vëgn contratada dala Uniun Europeica cun i Stać Unis d’America, y che le Presidënt dla Junta Provinziala Arno Kompatscher portarà dant al Consëi provinzial de Balsan.

USP – Deplü sorts de plantes da üa che an ćiafa ma plü dainrè aldedaincö vëgn presentàdes tl Museum dl Vin en vëndres, ai 23 de mà dales 7 da sëra a Kaltern. Tratan la presentaziun vëgnel inće pité la poscibilité da porvè fora i vins fać fora de chëstes plantes da üa.

Fà sport y incuntè jogn y jones dles trëi provinzies de Balsan, Trënt y dl Tirol: chësc pîta l´Euregio Sport Camp dai 13 ai 20 de messè a Baselga di Pinè tl Trentin. Tratan l’incuntada él sön le program en gröm de ativitês sportives sciöche arpizé, jadiné, nordic walking, dragon boat, trà cun l’ergo, cun laprò ćiamò escursciuns y workshops interatifs. La partezipaziun al camp costa 120 euro, le prisc cür le cost por le mangé y le dormì y assistënza. Les iscriziuns é davertes da śëgn inant.

USP - „Na maiù colaboraziun danter les Regiuns tles Alpes y dandaldöt danter i Istituć d’arichida à na gran importanza por le svilup dl’agricoltöra“: Chëstes les parores dl’assessur Schuler tratan na incuntada stada da püch a Balsan cun esperć dl setûr agrar dl Südtirol, dl Tirol, da Payern, dl Trentin, dla Val d’Aosta y dl Friul.

USP - La regolamentaziun por implanć por la produziun de biogas, i proscimi vari por l´inserimënt te n cheder y n contest storich di relić dl fascism y dl´integraziun de mituns migranć y mitans migrantes: chëstes é stades les tematiches plü importantes dla sentada da incö, mertesc ai 20 de mà dl 2014, dla Junta provinziala a Balsan.

La Biblioteca provinziala Dr. Friedrich Teßmann inviëia ala presentaziun dl liber „Hitler – Beneš – Tito. Konflikt, Krieg und Völkermord in Ostmittel- und Südosteuropa“ en jöbia, ai 29. de mà adöm cun Arnold Suppan, professur dla Academia Austriaca dles Sciënzes.

Da en mercuì, ai 21 de mà fajarà l´Ofize provinzial por la mobilité deplü intervistes sön les corieres por cöie adöm informaziuns por miorè le sorvisc dl trasport publich local.

USP - La Comisciun Provinziala por l’avalianza dles oportunitês à albü da püch süa sentada generala, olache àl é gnü definì les tematiches por i proscimi agn. Implü él inće gnü formè tratan la sentada deplü grups de laûr por deplü seturs spezifichs. „Por ći che reverda la parité dles oportunitês messun ćiare da miorè la colaboraziun danter les istituziuns dla provinzia, sciöche por ejëmpl danter le sorvisc por les ëres, l´aconsiadëssa por l’avalianza dles oportunitês y atres organisaziuns dla provinzia mo inće da foradecà“, dij l´assessuria Martha Stocker.