Atualità

USP - L program di lëures sun la stredes che la Jonta provinziela à (INIER) dat pro per l ann 2013 vëija dant cater de majeri lëures tla valedes ladines: l terzo toch dla streda de Rina, la streda de Pidro, l segondo puent sun l jëuf de Sela y slargë la streda de Pruca ite. Ntant vëniel nce purtà inant la proietazion dla ntreda nueva per la Val Badia a San Laurënz.

N’agenzia per cialé do i cuatieres cunvenzionei, la reduzion de manco liec di spediei permez a la pertenduda dl Stat y la culaburazion de svilup per 1,6 milion de euro ie stai i argumënc de majer nteres che l presidënt dla Provinzia Luis Durnwalder à prejentà tla cunferënza stampa riesc do la senteda dla Jonta provinziela dl 18 de merz.

USP – L Guviern talian ti ova metù dant ala Provinzia de Bulsan de tò demez 216 liec di spediei per sparanië custimënt. La Jonta provinziela à (NCUEI) ai 18 de merz fat ora che ntant dëssel me unì tëut demez na terza pert dla cumpëida damandeda da Roma.

USP – Bele da ani sënta la Provinzia pra la culaburazions de svilup sun trëi seves: sustëni de proiec de assoziazions ulenteres, la culaburazion ti paejes nia svilupei y la sensibilisazion dla populazion. La Jonta provinziela à (NCUEI) ai 18 de merz dat pro l program 2013 per na soma de 1,66 milion de euro.

USP - Per cialé do che i cuatieres cunvenzionei vënie nce nuzei da jënt cun residënza, che ne à nia mo cuatieres, dëssel unì njenià n’agenzia de cuntrol a livel provinziel. La Jonta provinziela à (NCUEI) ai 18 de merz nciarià l assessëur Tommasini de tò su cuntat cun l’Assoziazion di chemuns per nvië via na tel agenzia.

USP – Sculeies che fina chëst ann la scola mesana possa nchin ala fin de merz mo se scrì ite a na scola auta. A chiche ne à mo nia tëut na dezijion ti mët l assessëur ladin Mussner a cuer de se de jù plu avisa cun cie che l vën pità. Tla valedes ladines possen crì ora sies scoles autes: doi istituc tecnics economics, n lizeum linguistich, n lizeum pedagogich, n lizeum d’ert y na scola prufesciunela.

USP – Pra i campiunac dl mond de jadinè artistich à Carolina Kostner venciù la bedaia d’arjënt. Per chësc suzes straurdiner ti manda l presidënt dla Provinzia Luis Durnwalder y l assessëur ladin Florian Mussner i miëur auguresc: „Cun l titul da vizecampiunëssa dl mond à Carolina Kostner inò demustrà si gran capaziteies, purtan unëur al Südtirol y ala valedes ladines“.

USP – Ai 5 de dezëmber fovel unì giaurì la Rë zivica dla Provinzia de Bulsan nce tla rujeneda ladina. La bilanz di prim 100 dis (ai 15 de merz) mostra su che l ie nteres per l portal de nfurmazion tla rujeneda ladina y che la populazion ladina a scumencià a se usé dl servisc de nutizies, di servijes dl’aministrazion publica y dla banches dac. Drët vijitedes ie nce la previjions meteo tla rujeneda ladina.

USP – Per mparé a cunëscer co che vën purtà inant la rë dl internet aslune tl Südtirol à na delegazion dl ciamp economich dla Stiria n lunesc ai 12 de merz ancuntà l asssessëur provinziel Florian Mussner a Bulsan. Per i reprejentanc dal’Austria se tratovel dantaprima de mparé dal’esperienza tl Assessorat ai lëures publics ajache ëi ulëssa ënghe mëter a jì na tel rë.

L program de pruvedimënc acioche jëuni zënza lëur ruve pra na stiera, la unificazion di sistems informatics per dl’aministrazion publica dala Provinzia nchin ai chemuns y l paië do de cuntribuc mpermetui a pendolares ie stai i ponc de majer nteres tratei dala Jonta provinziela y prejentei dal presidënt Durnwalder te cunferënza stampa.