Atualità

USP – Te d’autri raions iel bele unì fat de bona sperienzes a prugramé eletronicamënter duta la luminazion publica, sparanian a chësta maniera nchin a 50 percënt dl’energia. La Jonta provinziela uel mëter a jì velch da de tel nce per l Südtirol y à (NCUEI) ai 28 de jené dat pro de scrì ora n cuncors.

USP – Aldò dla diretives stateles possel me unì njenià zëntri spezialisei per l tratamënt de tumores, sce l spedel à amaca cin repartizions che trata chësta malatia. La Jonta provinziela à (NCUEI) ai 28 de jené dat pro de junté de tel repartizions ti spediei a na maniera che a Burnech, Persenon, Bulsan y Maran giaten la zertificazion de zënter spezialisà per tumores.

USP - La gestions dla uties da mont che ie de avëi dla Provinzia unirà scrita ora per trëi ani. Chësc ie (NCUEI) ai 28 de jené unì dat pro dala Jonta provinziela che à nce fat ora che nvestimënc dl ost possa unì trai ju dal fit.

USP – N ann dant che l ne fova udù danora à la Jonta provinziela purtà inant l plann acioche de plu jënt abine da lëur. Chësc ie stat de bujën ajache la crisa economica à ntant nce arjont l marcià dl lëur tl Südtirol. L plann ie (NCUEI) ai 25 de jené unì nvià via dal assessëur Roberto Bizzo deberieda cun i partner soziei. Leprò iel nce unì metù on line n blog interativ nuef.

USP – A scumenciamënt dla terza ena de fauré, dai 18 ai 20, uniral tla scolines de Gherdëina y dla Val Badia tëut su l’iscrizions per l ann de scolina 2013-2014. I plu pitli che possa unì scric ite ala scolina tla valedes ladines muessa nchin ala fin de fauré 2013 avëi cumplì doi ani.

USP – Per ruvé tla graduatories de nsenianc tla scoles ladines muessen avëi fat n ejam de ladin dedicà. L proscimo ejam per nsenianc sarà chësta ann ai 20 de merz, n possa se lascé nuté su nchin al plu tert n mierculdi ai 30 de jené.

USP – I scolars y sü geniturs che mëss tó na dezijiun sön ći fà do la scora mesana po ai 31 de jenà y al pröm de forà s’informè sön ći che les scores altes da La Ila pîta. Te chisc dui dis ti vëgnel daurì les portes dl Istitut Tecnich Economich, dl Lizeum Linguistich y dl Lizeum dles Sciënzes Umanes a dötes les porsones interessades.

USP - Sculeies dla scoles autes, studënc de università y jëuni che à finà l studi giata nce chëst ann la puscibltà de fé nchin a trëi mënsc de pratica ti ufizies dl’Aministrazion provinziela. La cunescënza de plu rujenedes gëura la streda per pudëi fé esperienza de lëur nce tla scoles y ti ufizies destachei a Roma y a Bruxelles.

La cuantificazion dl dann dla smueia che fova unida ju a Badia, la chëuta nueva sun l refudam y n pest per l’energia alternativa ie deberieda cun la lege de ntegrazion di imigrei stai i argumënc prinzipei dla senteda dla Jonta provinziela che l presidënt Luis Durnwalder à prejentà te cunferënza stampa.

USP - La lege provinziela de ntergrazion ie stata n cumpromis danter n tratamënt valif per duc n cont de pruvedimënc soziei y l schivé che jënt da oradecà vënie me adalerch per via de chisc aiuc. Da pert dl Stat ne vëniel nia azetà la limitazion di 5 ani de lëur y residënza, nscì ie la Provinzia sfurzeda a crì do pusciblteies nueves.