Atualità

USP – La Jonta provinziela tën a si posizion contra l giaurì dla butëighes de dumënia. L regulamënt che ie unì dat pro (NCUEI) ai 19 de dezëmber lascia prò de giaurì de dumënia ti luesc turistics, ti auti luesc resta la dumënia de prinzip l di de paussa.

Le Presidënt dla Junta provinziala Luis Durnwalder, y le presidënt de Telecom Italia Franco Bernabè, à sotescrit (INCÖ) ai 16 de dezëmber a Balsan n’acordanza che portarà al superamënt dl “digital divide”. Cun la banda leria sön döt le raiun arà 120 mile porsones azès al internet aslöm.

USP - Che la Provinzia mësses tó pert al ressanamënt dl bilanz statal é tler por la Junta provinziala. "Mo ci che i ne azetarun nia, é tais y intervënc a nosta autonomia fac dal Stat zënza se damanè”, insciö le Presidënt dla Provinzia Luis Durnwalder (INCÖ) ai 15 de dezëmber do na sentada straordinara dla Junta provinziala sön le pachet de sparagn dl stat.

USP - Nsenianc de religion, la pluanies y chëi che lëura tla comunicazion possa da moinla se stizé sun n aiut nuef. L Servisc Inuvazion y cunsulënza dla Ntendënza Ladina (ex- Istitut Pedagogich Ladin) à dat ora n Glossar de Religion che ie unì prejentà (NSNUET) ai 15 de dezëmber tl Istitut tecnich Retia a Urtijëi.

USP – Per fé viver la Cultura ladina sustën la Provinzia de Bulsan truepa lies, artisc y istituzions. Tl ann 2011 iel tres l Assessorat ladin unì dat cuntribuc per na soma de 1.190.580 euro. Chësc sustëni finanziel ie unì spartì su danter 186 dumandes de cuntribuc valutedes dala Cunsulta provinziela ladina, l finanziamënt per l Istitut Culturel Ladin, produzions de televijion, publicazions, opres artistiches, proiec de educazion y n finanziamënt ala zaita La Usc di Ladins.

USP – Nchin ai 23 de dezëmber 2011 possa nsenianc fé dumanda te ruvé tla graduatories provinzieles dl ann de scola 2012/13 per la scoles ladines. La dumandes muessa unì dates ju ala Ntendënza ladina a Bulsan.

USP – I assessëures provinziei ulëssa fé na lingia de mudazions ala lege sun l frabiché cuatieres. Te si senteda da (NCUEI) ai 12 de dezëmber iel unì tenì na descuscion sun la pruposta de mudazion per giapé plu debota i grunc da frabiché, per regules nueves a sëurandé cuatieres soziei y l mëter adum di cuntribuc provinziei per l fit y l cuatier.

USP – La Jonta provinziela à (NCUEI) ai 12 de dezëmber dat pro de slargë la reduzion dl IRAP nce a firmes che aumënta l export. Cun chësc pruvedimënt uelen sustenì l vënder prudoc oradecà.

USP – L ne ie mo nia tler co che unirà a cialé ora la manovra de sparani dl Guviern Talian, ma per la Jonta provinziela iel tler che n fajerà recurs per giapé na pert dla chëutes straurdineres y per pudëi marciadé mo dan fé adatamënc al sistem de finanziamënt provinziel. L presidënt Durnwalder à (NCUEI) ai 12 de dezëmber fat al savëi che la Jonta provinziela à bele dat pro de fé recurs a n prim decret.

USP - Da n valgügn dis él tla rëi la plata nöia www.wopapa.it/la/wopapa/default.html tres chëra che an po menè ite propostes por la lîta dla "parora" y dla "parolata" dl ann 2011. Dal 2005 incà chir fora ince tl Südtirol na iuria les parores y les parolates dl ann fora dles propostes che é gnüdes menades ite dala popolaziun. La scomenciadia vëgn fata por düc trëi i lingac dla provinzia, todësch, talian y ladin. Al é ince n liam a facebook.