Atualità

USP –La cumpededa dla jënt che scumëncia cun l 9 de utober cumporta na basa de programazion per l’aministrazion publica. La detlarazion de grupa de rujeneda anonima vën damandeda per spartì su la ressorses publics a na maniera giusta y nsci per garantì pesc danter la grupes de rujeneda. Ai cuestioneres possen respuender online, la detlarazion de grupa de rujeneda possa mé unì fata su papier.

USP – L assessëur al’agricultura Hans Berger à prejentà dac sun la defendura di tieres y la campania nueva sun la castrazion de giac. Chësc ne ie nia unì fat n di per cajo: (NCUEI) ai 4 de utober ie l di nternaziunel per la defendura di tieres y di de S.Francësch, patron di tieres.

USP - Cun l 9 de utober scumëncia la 15ejima cumpededa dla jënt che dëssa purté n cheder statistich dla chemunanza tl Südtirol. Co che che chësta nrescida vën trata tres, cie che ti spieta ala families y la pusciblteies nueves de respuender ai cuestioneres, possen cialé do sun la plata web dl ASTAT dedicheda ala Cumpededa dla jënt.

USP – Le bel tëmp y le gran interès de feter 90 ghesc’ à acompagné la daurida dl’oasa de palsa Pantan Sarè a Pedraces. L’assessur provinzial Michl Laimer à invié ia l’ativité dla cuinta de indöt 10 oases de palsa programades pro les fontanes storiches de ega minerala.

USP – De utober ie l bilanz de previjion per l 2012 uni di ponc de majera priorità, nsci iela nce stata (NCUEI) ai 03 de utober tla senteda dla Jonta provinziela. Danter auter à i assessëures nce dat pro n signal nuef per la prutezion zevila, l daz sun l Stelvio y l proiet per la scines da Pruca suvier. La Jonta à pona tratà i ressevars dal’ega y la rë per purté l strom nchin pra la cëses.

USP - La Jonta provinziela à azetà l ejam positif dl mpat ambientel (UVP) per la trata dla ferata da Pruca nchin pra l tunel dl Prëner a Furtëza.

USP – L’ega di resservars vën te dut Südtirol nuzeda per blandé ciamps, per fé nëif y n cajo de meldefuech. Do avëi lascià lauré ora i criteries per la lueges adatedes a fé resservars dal’ega, à la Jonta provinziela (NCUEI) ai 03 de utober dat la ncëria de mustré su ulache l fossa de tel lueges adatedes.

USP – La Jonta provinziela à dat pro de adaté l signal de alarm per caji de prutezion zevila al standard nternaziunel. La sirena sunerà perchël me plu un n iede per n menut, mpede trëi iedesc ndolauter.

USP – Nchin ala fin de utober muessa la Jonta provinziela dé inant la pruposta dl bilanz provinziel 2012 al Cunsëi provinziel. Te si senteda (da NCUEI) dl 03 de utober à la Jonta provinziela scumencià a udëi dant na mpustazion generela cun na reduzion ntëur al 2%. Nsci na reduzion scialdi mëndra de chël che n minova te n prim mumënt.

USP – Nchin ala fin dl ann se aspieta la Jonta provinziela na resposta dai chemuns sce i uel se nuzé de si dërt de cumpré ju la rë de spartizion dl strom te si raion. Chësta rë ie chëst ann passeda dal’Enel ala Selnet.