Atualità

USP – L’analisa di resultac dla proves PISA mostra su n gran miuramënt di sculeies ladins a fé conc. Paredlan i resultac 2009 cun chëi dl 2006 iel nce unì a lum n miuramënt tl liejer, ntënder tesc’ y scienzes natureles. I resultac dl sistem nternaziunel de valutazion dla capaziteies di sculeies ie nce per la Scola Ladina n strumënt de urientamënt per la programazion y l miuramënt dl nseniamënt.

USP – Tobia Moroder de Urtijëi à venciù l prim pest dl cuncors de leteratura ladina metù a jì dal Assessorat provinziel Ladin. Chëst iede vëniel partì ora de plu pesc’: l segondo pest ie jit a Ruth Videsott y tla categuria di jëuni iel mé unì dat ora n segondo pest che ie jit a Julia Runggaldier. L’opres letereres unirà publichedes y d’ansciuda prejentedes pra na premiazion.

USP - En sabeda al pröm d’otober saràl da aldì por le pröm iade le grup Ganes tla Val Badia. Les chertes por le conzert dales 8 da sëra tla Ciasa de Cultura a La Ila é bele dötes gnüdes venüdes. Chësc desmostra le gran suzès por la scomenciadia dl Istitut Ladin Micurà de Rü, che à orü ti dè l’ocajiun ala jënt ladina de aldì a Ciasa le trio badiot che à portè les Cianties ladines al publich foradecà.

USP – La Jonta provinziela à scumencià a lauré per l bilanz 2012, scebën che l ie rie fé previjions ajache la situazion a Roma possa mo se mudé. Na cunseguënza dla manovra finanziera pudëssa nce vester l saré de suneries. I assessëures à udù dant normatives per mplanc da fé strom y energia termica y à udù dant mo finanziamënc per l barat de cuatieres contra puscions militeres.

USP – I paures che ne uel nce tl daunì nia paië l chëuta sun frabicac ICI, muessa se cruzië che i cëses o tublei vënie metui tla drëta categuria dl Cataster. La dumandes per la mudazion de categuria muessa unì fates nchin ai 30 de setëmber.

USP – Aldò dla manovra finanziera per salvé la finanzes dl Stat Talian, dëssel unì sarà la mëndra suneries per sparanië. La Jonta provinziela de Bulsan à (NCUEI) ai 26 de setëmber fat ora de ntervenì per tëmp acioche ne vënie nia saredes la suneries.

USP – I mplanc de energia alternativa cun chëi che l vën fat strom y ciaut vën fai for de plu nce te nosc raions. La Jonta provinziela se damanda che pra i mplanc de chësta sort (Blockheizkraftwerke/impianti di cogenerazione) che à na produzion de passa 100 kw, muessel unì nuzà amaca 70% dl’energia termica.

USP - La Jonta provinziela de Bulsan à te si senteda (da NCUEI) ai 26 de setëmber dat pro de junté 50 milion de euro al capitul per ressanamënc de cuatieres per saudeies. Chisc cuatieres ie pert dl barat cun l Stat per giapé raions militeres, te de bona posizions, che ne vën nia plu adurvei.

USP – Per l proscimo bilanz provinziel fej la Jonta provinziela cont cun 130 milion de ntredes de plu. Davia che la manovra finanziera dl Stat se damanda de smendrì dassën i custimënc, sarà la soma de bilanz n auter ann mpomo feter la medema sciche chëst ann.

USP – La mpurtanza dla rujeneda dl’oma, vën NCUEI ai 26 de setëmber sorisseda particularmënter n ucajion dl di nternaziunel dla rujenedes. L assessëur ladin Florian Mussner sorissea che la rujeneda dl’oma ie pert de nosta identità y che l ne se trata nia me de paroles ma dl’esprescion de nosc vester.