Atualità

USP - En mertesc, ai 16 d’agost dl 2011, ti vëgnel dè ia i posc’ por l’ann de scolina 2011/12 al personal pedagogich dles scolines ladines. La lîta di posc’ scomencia dales 9 da doman tla sënta dla Direziun dles scolines a Picolin.

USP – N gran mostra coletiva dl’ert nueva tl Südtirol sarà n auter ann, tl 2012, l resultat de na culaburazion danter la repartizions provinzieles dla cultura y l Museion. Artisc’ jëuni possa mo se nunzië nchin ala fin de utober per fé pea la mostra “Panorama 4”. Nce urganisazions artistiches possa se nunzië artisc’ al Ufize provinziel per la cultura per chësta mostra che tol ite duta trëi grupes de rujeneda.

USP - 34 nsenianc ladins à (NCUEI) ai 05 de agost pudù pië do na stiera sciche suplënza anuela tla scoles ladines. Tla Ntendënza ladina a Bulsan iel unì sëurandat la stieres per i nsenianc dla scoles elementeres, mesanes y autes che à fat l’abilitazion y che fova tla graduatories aldò. 59 stieres per suplënzes unirà i proscimi dis sëurandates diretamënter dala direzions de scola aldò dla graduatories de istitut per i nsenianc zënza abilitazion.

USP – N vënderdi ai 12 de agost uniral tl Tublà da Nives te Sëlva giaurì la mostra tal titul „Oswald von Wolkenstein in Art 1961-2011“. L unirà mustrà retrac dl ciantautor, poet, cumponist y politich che ie unic fai ntan i ultimi 50 ani da 14 artisc tudësc, svizeri y dl Sudtirol. La giaurida sarà dala sies da sëira.

USP – Elisabeth Baur y Maria Kostner ie (NCUEI) ai 05 de agost unides nciariedes ufizialmënter sciche diretëures nueves tla scoles ladines. Elisabeth Baur de Urtijëi sëurantulerà la direzions dl lizeo d’Ert y dla Scola Prufescionela a Urtijëi. Maria Kostner da Bula sëurantulerà la direzion raionela dl’elementeres de Urtijëi y Runcadic cun la scola mesana de Urtijëi. Si lëur scumencerà ufizialmënter cun l prim de setëmber.

La cumpededa dla jënt, se giaurì culturalmënter y la inuvazion dla Scola Ladina ie stai i argumënc prinzipei per l assessëur ladin Florian Mussner te si ancunteda de mesa legislatura. N cont di lëures publics al prejentà i obietives n cont di culegamënc internet a slune y modiei de finanziamënt nueves.

Cun na mëndra bilanz a desposizion muessa nce se mudé l frabiché publich. Cualità, tenì ti ani, frabiché scëmpl deberieda cun l sparanië y nueva formes de finanziamënt ie l’urientamënt dl assessëur Florian Mussner prejentà (NCUEI) ai 4 de agost tl’ancunteda de metà legislatura a Sureghes. L plu adatà per i jëufs ie aldò dl assessëur n daz, nuzé i mplanc portamont y n di dla rodes n iede al mëns.

Duc i chemuns dëssa unì tachei ite al internet a slune tres la rë de fibres otiches. A chësc mpëni ti à l assessëur Florian Mussner dat priorità nchin dl 2013, per garantì la cualità de vita nce ti raions ora di majeri zëntri. Na majera pert di nvestimënc dai pro ie proietei tla val Badia.

La scola paritetica ladina dëssa se svilupé inant y se adaté ai bujëns di tëmps. Pra l’ancunteda de metà legislatura à l assessëur ladin Florian Mussner (NCUEI) ai 04 de agost a Sureghes cunedì che n ulëssa mëter man l nseniamënt de vel materia tla rujeneda nglëija. La matura paritetica dëssa unì recunesciuda per l bilinguism „B“.

La cultura ladina dëssa unì ntenduda, cunesciuda y valoriseda nce de vies dl’autra grupes de rujeneda. Te si ancunteda de metà legislatura à l assessëur ladin Florian Mussner (NCUEI) ai 04 de agost prejentà tla scolina de Sureghes si vijion de se giaurì culturalmënter.