Atualità

USP - La segonda cumiscion provinziela per stravardé la cuntreda à n merdi ai 19 de lugio dat pro proiec per n stont de nfurmazion a Pederü y n ntervënt contra la levines te Sëlva. Leprò iel nce unì azetà n garage pra la sentadoia Florian sun Mont Sëuc y n adatamënt dl rone pra l zënter da podejé sun Mont de Pana a S.Cristina.

USP – Ala fin dl mëns uniral a S.Ciascian giaurì la nueva sënta destacheda dl Museum Ladin dedicheda ala lores de Conturines, l Ursus ladinicus. Chësc museum nuef, che valorisea nce l raion dolomitich, ie (NCUEI) ai 19 de lugio unì prejentà dal presidënt dla Provinzia Durnwalder y dal’assessëura Kasslatter Mur te na cunferënza stampa a Bulsan.

USP – La Jonta provinziela à (ncuei) ai 18 de lugio dat pro de mëter la furmazion prufesciunela pra i departimënc de educazion a na maniera da mëter a jì da nuef l sistem de furmazion a na maniera plu megra y plu efizienta. La reorganisazion dla ciamp dla furmazion ie me na pert de n majer pachetl de pruvedimënc che la Jonta provinziela uel purté inant ti proscimi mënsc per smëndrì la burocrazia.

USP – Diretamënter o nce nia diretamënter arà la manovra de sparani dl Guviern talian na fazion sun Südtirol. Ma davia che n se aspieta mo mudazions ne vëijen sën nia l drë mumënt per se paré. Chësta ie stata la cuntlujion dla Jonta provinziela, (ncuei) ai 18 de lugio, n cont dla manovra de sparani.

USP - Ai 22 de lugio giaurirà l presidënt dla Provinzia Luis Durnwalder y l assessëur ai lëures publics Florian Mussner l Geotrail nuef sa Bula. Sun l troi possen udëi testemunianzes de 300 milion de ani de storia de nosc planet.

USP - Duc i candidac al ejam de matura tla scoles ladines ie passei. Chëst ann iel nscì 60 jëuni che possa zapé ite tl mond dl lëur o dl studi cun na preparazion stizeda sun de plu rujenedes. I resultac di ejams de scola ie (ncuei) ai 15 de lugio unic prejentei dai assessëures provinziei ala scoles y reprejentanc dla trëi ntendënzes.

USP – A S.Ciascian iel unì njenià na sezion destacheda dl Museum Ladin dedicheda al Ursus ladinicus, la lores de Conturines che fova unides abinedes dan 24 ani. Chësta sezion nueva unirà giaurida ai 30 de lugio. N merdi ai 19 de lugio prejenterà l presidënt dla Provinzia Durnwalder y l’assessëura Kasslatter Mur chësta sezion nueva te na cunferënza stampa a Bulsan.

USP – Per unifiché i sistemes, i muré y i rënder plu scëmpli uniral cun l prim de setëmber scumencià cun la detlarazion unificheda de davani y avëi. Scumencià uniral cun l ciamp soziel y saniter: per damandé na prestazion tlecheral me plu de jù na sëula detlarazion anuela. Per ti judé ai zitadins tl scrì ora chësta detlarazion unificheda, à l assessëur Richard Theiner (ncuei) ai 13 de lugio sotscrì na cunvenzion cun i patronac y i CAAF.

USP – Ala vijion de mantenì la populazion ti mëndri luesc ora per la valedes ie dedicà l argumënt de majer nteres che l presidënt dla provinzia à cunedì (ncuei) ai 11 de lugio do la senteda dla Jonta provinziela. L sparanië y davanië de effiziënza ie la rejons prinzipeles per la dezijion de mascima de mëter adum la sozietà de nfurmatica SIAG cun la repartizion provinziela cumpetënta. A Toblach uniral fat na majera mostra sun la Dolomites-Unesco.

USP - La Jonta provinziela à (ncuei) ai 11 de lugio tratà l paië ju di debic de nvestimënt da pert di chemuns per deponies dal refudam y sareneres. I criteries ie unic adatei.