Atualità

USP – La Repartizion ladina dl’Università liedia de Bulsan dëssa unì svilupeda inant. Te n’ancunteda danter l assessëur provinziel ladin Florian Mussner, l presidënt dl’università Konrad Bergmeister y l cuordinadëur dla Repartizion ladina Theodor Rifesser iesen stai a una sun l bujën de realisé n Istitut de Ladinistica y na mëisa de descuscion per miuré la culaburazion cun la istituzions ladines.

USP – 13 lëures y nvestizions per 3,4 milion de euro cumporta l rë de fibres otiches che unirà fates tl raion Salten-Scilier. „L ie n gran custimënt, ma i vantajes per l raion ie mo majeri“ dij l assessëur provinziel Florian Mussner cunscidran che raions zënza internet slune ne puderà tosc nia plu tenì l var sun l marcià. Un de chisc lëures vën nce fat a Urtijëi.

USP – La Jonta provinziela à ncuei tëut doi dezijions sun dumanda dl Cunsëi dl chemuns. Cun n‘agenzia per sëurandé ncëries publics uelen pité n servisc plu efizient per la Provinzia y nce per l’autra aministrazions publiches. Sun dumanda di chemuns iel mo n iede unì spënt la data per i planns di raions de pericul. I chemuns reverda nce la partizion de scioldi dala zentreles dal strom. Families y pendolares à giapà na reduzion dla tarifes dl trasport publich. Per stravardé l tlima uelen arjonjer plu ressanamënc de vedla cëses y n trasport cun energia alternativa.

USP – Da plu mënsc oven scumencià a lauré tl sistem dla tarifes dl trasport publich, la Jonta provinziela à (NCUEI) ai 20 de juni dat pro l sistem nuef. L ie unì mantenì l prinzip che premia chiche furnea de plu y sëuraprò iel mo unì udù dant reduzions per families y pendolares.

USP – La cunzescions dal ‘ega per la produzion de strom vëija nce dat nvestizions per l ambient. Feter 400 milion de euro dëssa te tëmp de 30 ani giapé i chemuns che vën tuchei dala zentreles dal strom. La Jonta provinziela à (NCUEI) ai 20 de juni partì 234 milion de euro a chemuns che fej pert de sies raions.

USP – Südtirol dëssa nchin al 2050, n puech al iede deventé na provinzia tlima. Per arjonjer chësc gran travert che n se à tëut dant iel debujën de n plann aldò cun pruvedimënc strategics. La Jonta provinziela se à (NCUEI) ai 20 de juni dat ju cun chësc argumënt cunscidran dantaprima de nuzé l’energia cun talënt. N pont zentrel ie l ressanamënt de vedla cëses y l trasport.

USP – La Provinzia de Bulsan muessa sparanië 59 milion de euro per tenì ite l’acurdanza de stabilità ududa dan dal Stat. La Jonta provinziela à (NCUEI) ai 20 de juni data pro i pruvedimënc singuli che va dal personal nchin a ncëries externes y na urganisazion plu efizienta.

USP – Na nterpretazion unificheda per sëurandé ncëries, sparanië scioldi y dé segurëza giuridica ie i fins prinzipei che dëssa unì arjont metan su n’agenzia che se cruzië dla sëurandata de ncëries publiches. La Jonta provinziela à (NCUEI) ai 20 de juni delibrà l prinzip de mëter su na tel agenzia che dëssa vester de utl per duta l’aministrazions publiches.

USP – La Jonta provinziela de Bulsan à spënt de 5 ani la data nchin a canche i chemuns muessa avëi anjenià si planns di raions de pericul. I assessëures provinziei ie stai a una de dé do ala dumanda di Cunsëi di chemuns sce da si pert vëniel fat na lista de priorità cun i chemuns cun periculi.

USP – L sustëni finanziel per la cultura ladina da pert dla Provinzia de Bulsan dëssa tenì cont mo de plu dl’ativiteies che vën fates tla valedes ladines. Chësc ie unì ora dal’ultima senteda dla Cunsulta culturela che ie stata chëst ena passeda a Bulsan.