Atualità

USP – La giaurida dla zircunvalazion nueva de Vandoies ie (NCUEI) ai 17 de juni stat n mumënt storich per la cumenanza dl luech tla valeda de Puster. Tres chëla che l muvimënt de auti ne passa nia plu tres l luech vëniel per i zitadins a se l dé plu segurëza sun streda, na miëur cualità de vita y pruspetives nueves de svilup. L presidënt dla Provinzia Durnwalder y assessëur Florian Mussner à ufizialmënter lascià passé i prim auti sun la streda nueva.

USP – Sun l stradon de Gherdëina, vëniel a Urtijëi cumedà l puent daujin al luech de Cucheneies. Davia che l muvimënt di auti possa astilé ora sun l vedl stradon, iel mesun finé i lëures te tëmp de n mëns mpede de trëi mënsc.

USP – Dal prim de lugio jirà n drova l còdesc etich dl IPES che ie unì prejentà (NCUEI) ai 16 de juni. Per l assessëur provinziel Tommasini iel n var mpurtant dla reorganisazion dl istitut per dé plu trasparënza y efiziënza, ma nce per astilé ora dantaprima na contrapusizion de nteresc.

USP – La scola fina. Per velch scumëncia la feries, per d’autri i ejams y pona n capitul nuef tla vita. Nce per la Scola ladina se stluj n capitul. Dantaldut per la scola auta che ie unida refurmeda scumencerà de setëmber n capitul nuef. L assessëur ladin Mussner y l ntendënt Verra sorissea che la mudazions, i miuramënc y la reorganisazion ie states mesun tres la culaburazion y la bona ulentà de duc chëi che lëura per la istruzion de nosc sculeies.

USP – N vënderdi ai 17 de juni scumëncia nce tla scoles ladines i ejams per finé via la scola. N iede uniral fat i ejams scric de 5 dis tla scola mesana y pona n mierculdi ai 22 de juni scumëncia cater dis de ejams scric tla scoles autes. Permez a d’autra scoles vëniel tla scoles paritetiches ladines fat na prova scrita de plu.

USP – La Grupa europea de culaburazion teritoriela (GECT/EVTZ) danter Trentin, Bulsan y Tirol ie deventeda istituzion. La trëi Jontes provinzieles à (NCUEI) ai 14 de juni sotscrì ufizialmënter l statut de chësta istituzion nueva che fej pert dl’Euregio. Tl Ciastel Thun tla val di Non iel nce bele unì fat ora i argumënc de priorità per la istituzion nueva: mubilità y energia, sanità, economia y nrescida.

USP – I sculeies dla scoles ladines fej nce unëur a si scoles tl sport. Verena Hofer de Urtijëi à venciù i campionac taliani de tennis per la scoles.

USP – Ti ultimi agn s’à le Museum Ladin Ciastel de Tor dè dassënn da fà por mostrè sö la storia y la cultura ladina y sostignì la identificaziun dla jënt ladina cun cun süa storia y süa cultura. Ai 24 de jügn él 10 agn ca che al é gnü daurì le Museum Ladin. La sënta destacada nöia a San Ciascian y le depot che vëgn fat a San Martin vëgn sostignis dal Assessorat por i laûrs publics y odüs sciöche scincunda ala jënt ladina por chësta ocajiun.

USP – A Urtijëi à (inier) ai 8 de juni mo n iede messù unì s’arà n cantier. “L ne ie mo mei suzedù che n cantier a messù unì s’arà doi iedesc te tëmp de doi enes per rejons de segurëza” dij l diretëur dla repartizion per l lëur Helmuth Sinn, dessenà y cun festide.

USP – L Museum Ladin Ciastel de Tor à l ann passà dedicà gran mpëni per l’ert metan a jì doi cuncorsc d’ert. Tres la „3ª Trienala Ladina“ y l pest de scultura “Richard Agreiter“ à artisc’ ladins fat de bela opres che ie nce unì valutedes y analisedes tres rezenscions. Ai 7 de juni iel tl Museion a Bulsan unì prejentà n catalogh de chisc lëures scrit te cater rujenedes.