Atualità

USP – L barat danter l Stat y la Provinzia va inant. Da permò iel unì sotscrì n’acurdanza che la Provinzia frabica, concia su o compra sies casermes per i Carabinieri y la Polizia, y giapa lessù puscions stateles che à l medemo valor. “Chësta puscions ie de gran mpurtanza per l svilup de nosta ziteies y luesc” dij l presidënt Luis Durnwalder. Una de chësta casermes unirà nce cumpreda a Badia.

USP – Chisc dis vëniel sun la streda dl jëuf de Frea, dala pert de Corvara y sun la streda dla Val Badia jit inant a museré l deslivel. Ntan chisc lëures, che ie udui dant nchin ai 17 de juni iel da fé cont che la streda messerà uni tant unì sareda de fin o che l sarà a aspité pra n semafer.

USP - Ferates nueves, promozion y sburdla economica tres sustëni ala produzions de films tl Südtirol, l program per aspité demanco te spedel, bonus de cubatura y l bilanz dl zënter per avisé segures. Chisc ie stai i argumënc prinzipei che l presidënt dla Provinzia Durnwalder à prejentà te cunferënza stampa, ncuei ai 23 de mei riesc do la senteda dal Jonta provinziela.

USP – La Jonta provinziela uel sëurantò l bonus de cuabatura udù dant dal Stat ma me sce l vën nce fat n ressanamënt per sparanië energia. “Chësc pruvedimënt dëssa nce purté vantajes al ambient y ala cumenanza” à sorissà (ncuei) ai 23 de mei l presidënt Durnwalder do la senteda dla Jonta provinziela.

USP – I ulenteres che fej servisc de prim aiut possa pité assistënza ai dutores, ma sciche i nfermieres ne possi nia tò nstësc dezijions n cont de traté i pazienc. La Jonta provinziela à (ncuei) ai 23 de mei segurà chësta regulamentazion che ie nce scrita sun la lëtra dl 2006 dl assessëur Richard Theiner.

USP – Tenian cont di urientamënc bele dai pro, à la Jonta provinziela (ncuei) ai 23 de mei azetà l program per smendrì l aspité per prestazions spezialistiches. N se à tëut dant che i pazienc dëssa aspité al plu nchin a 60 dis per caji che se lascia spusté y te ezezions nchina 120 dis.

USP – Sciche udù dant pra la giaurida dl zënter per avisé segures dl 2008, dëssa l Safety Park fé jì a ega l bilanz da chëst ann. Chësc ie (ncuei) ai 23 de mei unì fat ora dala Jonta provinziela.

USP – 27 dumandes de sustëni per la produzion de films tl raion dl Südtirol fova unides mandedes ite ala Business Location Südtirol (BLS) y ie unides analisedes dala cumiscion de esperc. La Jonta provinziela à fat ora de finanzië 10 de chisc proiec per films.

USP – Per l trasport publich dëssel unì cumprà 8 ferates nueves. La Jonta provinziela à (ncuei) te si senteda dl 23 de mei dat pro l nvestimënt che dëssa unì curì cun l sparani dl fit per de vedla ferates.

USP - En ocajiun dl dé mondial dla varieté cultura por le dialogh y le svilup, ai 21 de mà, ti recorda l’assessur ladin Florian Mussner ai Ladins de ciarè dles tradiziuns, dles usanzes y dl lingaz y de i dè inant, mo ince de ne se stlü nia a ci che é nü.