Atualità

L’Euregio Tirol-Südtirol-Trentino sciche cunlianza teritoriela possa deventé istituzion. Ai 3 de mei (NCUEI) à l presidënt dla Provinzia de Bulsan giapà la comunicazion dala Presidënza di Ministri a Roma che l possa unì metù su l’Euregio sciche grupa europea de culaburazion teritoriela (EVTZ: Europäischer Verbund territorialer Zusammenarbeit).

USP – Nchin ala fin de mei possa duc i nteressei mandé ite stories adatedes a jëuni y jëunes per l cuncors de leteratura ladina scrit ora dal Ufize provinziel per la Cultura Ladina. Cun pesc’ per na soma de 6.000 euro y la publicazion di scric te n liber sustën la Provinzia de Bulsan l scrì tla rujeneda ladina.

Argumënc de carater storich ie ncuei (2 de mei) stai la pert zentrela dla senteda dla Jonta provinziela. Tla cunferënza stampa à l presidënt Durnwalder cunedì la soluzion per curì ju l relief de Mussolini a Bulsan, che l ie unì metù su la prima tofles pra i ossares y che per i 50 ani dala nuet di fuesc, uniral tenì na manifestazion de descuscion. I assessëures provinziei à nce tëut na dezijion n cont de scrì ora lëures publics, cuatieres ti zëntri di luesc y l servisc “info Tv”.

USP – A Gossensaß iel (NCUEI) ai 2 de mei unì metù su la prima tofles per spieghé ciuldì che l fova unì fat i ossares. Ntan i proscimi dis uniral nce metù su la tofles a Mals, per Sanciana/Innichen mancel mo la lizënza.

USP – Pudëi fé de plu documënc pra na purtina sëula, zënza messëi purté i documënc da un n ufize al auter. Chësc ie chël che la Jonta provinziela uel pité per de ju dumandes. La pruposta de lege reverda l manejé ntern de pratiches y de les dé inant danter Provinzia, Camera de Cumerz y chemuns.

USP – I lëures publics ne possa nia me unì scric ora duc te un n iede aldò dl proiet, ma i possa nce unì scric ora singularmënter aldò di mestieres. “La Union Europea nes à fat al savëi che pudon scrì ora i lëures singularmënter, sën ons adatà l regulamënt” à dit l presidënt dla Provinzia (ncuei) ai 2 de mei do la senteda dla Jonta provinziela.

USP – I 50 ani dala “nuet di fuesc” dëssa pité ucajion per se de ju cun nosta storia y per fé na descuscion. Cun chësc pensier à la Jonta provinziela (ncuei) ai 2 de mei dat pro de mëter a jì na sëira de descuscion ai 9 de juni 2011.

USP – Mpede udëi dant raions nueves per frabiché cuatieres, sustën la Provinzia i ressanamënc de vedla cëses ti zëntri di luesc. La Jonta provinziela à (ncuei) ai 2 de mei dat pro de sustenì nce segondi o terzi cuatieres sce i vën cunvenzionei y lascei via al fit provinziel. A chësta maniera uelen valorisé i zëntri y smëndrì l’espanscion di luesc.

USP – Cun n canal de televijion uelen dé nfurmazion turistica ala jënt che vën tl Südtirol a na maniera moderna. La Jonta provinziela à (ncuei) ai 2 de mei tratà la prupostes y à fat ora de lascé adaté l proiet y l custimënt.

USP - La Jonta provinziela à tëut na dezijion provisoria per l relief fat tl tëmp dl fascism, sun l palaz dla finanzes a Bulsan. Zënza tuché l relief nstës, ma per scunjeré la pruvocazion dl fascism uniral fat dansù na scipa che n ne vëija nia tres.