Atualità

USP – “Vedli inuemes che vën adurvei da generazions per ladin, dëssa nce unì azetei tla rujeneda ladina zënza traduzions.” Cun chësc pensier tol l assessëur provinziel Florian Mussner posizion a lëtres te zaites n cont dla numinazion tudëscia dl Troi Paian.

La Biblioteca provinziala Teßmann mët a jì en jöbia, 5 de mà dl 2011, dales 8, na sëra dedicada a Herbert Rosendorfer. Do na picia introduziun sön le material che al ti à lascè ala Biblioteca liaràl dant val’ fora de süa opera „Deutsche Geschichte“.

USP – Da n merdi, 3 de mei vëniel tla provinzia de Bulsan scumencià a mëter ora la trapules per ti fé fé ala bolpes la dlaveies contra la rabia. Nchin a n’autëza de 2300 metri uniral nce chëst iede smacà ora trapules da n julier. Do chësta azion ne n uniral mo fat na segonda contra la rabia.

USP – Carolina Kostner à venciù la bedaia de bront pra i campionac dl mond de jadiné a Mosca. Per chësc suzes mundiel ti fej l presidënt dla provinzia Luis Durnwalder i auguresc y n gran cumplimënt „Carolina à cumbatù, la à tenì permez y à arjont la bedaia de bront. Per ëila n suzes y per nosta provinzia n unëur y na gran legrëza“.

USP – La maniera de finanzië i chemuns dëssa unì laureda ora da nuef. De chësc ie (inier) ai 28 de auril stai a una la Jonta provinziela y l Cunsëi di chemuns. Da nuef dëssa nce unì metù a jì la spartizion di scioldi danter i chemuns per arjonjer na spartizion plu giusta.

USP – La Provinzia y i chemuns uel mëter a jì da nuef l finanziamënt dla urganisazions turistiches, te ce forma iel mo da udëi, tler iel che l muessa respeté i bujëns dla situazion. Riesc do l’ancunteda danter Jonta provinziela y l cunsëi di chemuns, à l presidënt Durnwalder (inier) ai 28 de auril cunedì che la regulamentazion nueva unirà bonamënter nvieda via cun la lege finanziera.

USP – La firma dal acel Valbruna puderà resté a Bulsan Sud seguran nce sce l ie tëmps de crisa, la stieres. Chësc à i dirijënc dla firma segurà al assessëur Roberto Bizzo che à da pert dla Provinzia arbassà 50% dl fit per la fabrich a Bulsan. L cuntrat danter Valbruna y la Provinzia ie unì sotscrì (ncuei) ai 28 de auril.

USP – Dan doi ani, ai 23 de auril, ova l Ufize stampa dla Provinzia de Bulsan mudernisà si plata internet tla rujeneda ladina. La cumpëides de tanc che se à nuzà de chësta plata web cun i comunicac, fotos, ntervistes audio y video desmostra che l nteres per l servisc de nfurmazion tla rujeneda ladina devënta for majer. Ntan l ultimo ann iel unì cumpedà 37.884 vijites.

USP – Chisc dis vëniel scumencià i lëures per fé sun n gran mur dedora da Puntives per tenì su l rone sëura streda. L Servisc provinziel per la stredes tl raion Salten Scilier fej chësc mur a na maniera da scunjeré l pericul che tome ju sasc. Ntan i lëures saral for inò de bujën de fermé i auti. Nchin tla segonda ena de mei puderan me passé te una direzion al iede.

USP – Per la Jonta provinziela ne iel nia da pesimé n cont dl pudëi cialé ai cuntrac dla SEL cun ENEL y Edison. “L ie na sentënza dl Cunsëi de Stat a chëla che tramedoi pertes muessa se tenì” dij la Jonta provinziela. Chësc uel di che la SEl muessa ti lascé udëi i cuntrac ai cunselieres di Vërc, ma ëi ne possa nia purté i cuntenuc al publich.