Atualità

USP – Chisc dis scomëncion cun i laûrs por dortoré la strada danter San Martin y Lungiarü. Sön inciaria dl Assessorat provinzial por i laûrs publics vëgnel deslarié y avalié la strada por garantì na miù viabilité y de plü segurëza sön strada.

USP – Davia che l vën laurà sun la streda dla Val Badia, puderà l muvimënt di auti a Picolin, me passé te una direzion al iede. Chësta regulamentazion ie ududa dant nchin mez lugio.

USP – Reprejentanc dl servisc de ntegrazion dla scoles ladines lëura ativamënter te na grupa nternaziunela de metodologies dl mparé y per sustenì la ntegrazion tl’Europa. Tla Romania iel da permò uni tenì n’ancunteda sun cunzec de sustëni per mprenditëures jëuni che uel meter su firmes nueves y nsci dé da lëur a jënt. La proscima ancunteda sarà tl Südtirol per mparé a cunëscer proiec de ntegrazion tla scoles ladines.

USP – Co che l vën curà y mantenì la rujeneda y cultura ladina nteressea nce l’Ambasciata britanica. L assessëur Mussner à (NCUEI) ai 31 de merz prejentà la realtà ladina a Andrew Jacksen, culaburadëur dl ambasciata a Viena.

USP – Imigrei che ne respetea nia la lege resta de cumpetënza dl Minister dl intern, ma muciadives unirà nce tëuc su dala regions. Sun chësta posizion ie (N SËIRA) ai 30 de merz ruvei a una i reprejentanc dla regions talianes. I muciadives dëssa unì tëuc su n relazion ala cumpëida dla populazion, nsci iesen ruvei a una danter l Stat y la regions. L Südtirol ie te chësta tratatives unì reprejentà dal vizepresidënt Hans Berger.

USP – Vën pa l’esigënzes de nosta sozietà y dla scola ladina curides cun la furmazion atuela di nsenianc? La resposta dëssa dé n cungres scientifich metù a jì n ucajion di 10 ani dla Repartizion ladina d’Università de Bulsan. Esperc de furmazion, respunsabli dl’università y dla scola ladina, deberieda cun l assessëur provinziel ladin y respunsabli da vita soziela fajerà l pont dla situazion n cont dla furmazion di nsenianc ladins. L cungres dal titul “Le ladin tl sistem furmatif” vën tenì n mierculdi ai 6 de auril tla sënta universitera a Persenon.

USP – Fora por les valades prinzipales dl Südtirol él bele gnü metü les fires otiches por l’internet asvelt; cina dl 2013 désseres avëi arjunt düc i comuns a na moda che la comunicaziun digitala arjunjes n livel alt te döta la provinzia. En lönesc, ai 28 de merz (inier) à la Junta provinziala aprovè le program anual por les infrastrotöres dl internet a banda leria presentè dal assessur Florian Mussner. A chësta manira él gnü garantì investimënc por 8,3 miliuns de euro. Feter n terzo de chësta soma vëgn spenü ite por la Val Badia.

USP - Le numer nü dla revista AULES é dedicada ala tematica dl suzès. Ara ne se trata nia ma de suzès y insuzès scolastich, mo ince de ciamps desvalis dla vita da vigni dé. Tla revista por les scores dada fora dal’ Intendënza Ladina, él da lì tesc’ por ladin, talian, todësch y grijun.

USP – La pruposta dla cumiscion de esperc n cont dla posizion dl zënter cumerziel a Bulsan ie unida azeteda dala Jonta provinziela che à nce fat i prim vares per ntegré l zënter tl plann urbanistich. I esperc ova valutà la strutura “Twenty” che ie bele tla streda Galiei, sciche la miëur luegia. – Limitazions per majera butëighes nce ti mëndri luesc.

USP – La Jonta provinziela de Bulsan à (NCUEI) ai 28 de merz azetà l masterplan sun l svilup dl aeoroport de Bulsan. Chësc ie stat debujën per giapé la cunzescion dal’ENAC. I assessëures ie stai a una de cherdé ite na mëisa de descuscion cun duta la pertes nteressedes per arjonjer n cumpromis sun i lëures che ie debujën de fé.