Atualità

USP – Chisc dis vëniel spartì ora l’ultima pert dla 400.000 chertes saniteres nueves che cun n microchip puderà unì nuzedes per na lingia de servijes dl’aministrazion publica. La cherta sanitera – cherta provinziela di servijes, puderà da (ncuei) ai 7 de merz unì metuda n drova pra la purtines anjeniedes ite aposta.

USP – La statistica sun i ejams de bi- y trilinguism, publicheda dal’Astat, mostra su che i candidac ladins passa scialdi plu saurì i ejams permez ala cumpëida generela. “Feter 70% di ladins passa l ejam permez ala cuota provinziela de 42%, ie chësc n sëni tler che nosc sistem scolastich porta de bon resultac y che i Ladins à de bona cunescënzes de nosta trëi rujenedes” sorissea l assessëur Florian Mussner.

USP - L tunel de Petlin sun l stradon de Gherdëina a Urtijëi, vën chëst ena puzenà. Da n mierculdi ai 9 nchin a n vënderdi ai 11 de merz saral de nuet me mesun passé te una direzion al iede.

USP – Feter mile sculeies de mujiga sarà dai 9 nchin ai 18 de merz cuncurënc dl cuncors de mujiga per dut l Tirol “prima la musica”. Chëst ann vëniel metù a jì tl Südtirol y coordinà dala Scoles de Mujiga de Tluses y de Sëuc. L’assessëures provinzieles Kasslatter Mur y Beate Palfrader dl Tirol à (ncuei) ai 4 de merz prejentà l cuncors a Bulsan.

USP – Normatives plu tleres per frabiché sun Mont Sëuc, ie l resultat dla senteda dla cumiscion provinziela per la defendura dla cuntreda, stata n merdi ai prim de merz. La cumiscion à azetà mudazions al plann de cuntreda per la Mont Sëuc che reverda l frabiché sëura tiera y nce sota tiera.

USP – N lunesc, ai 7 de merz saral sun la streda de Gherdëina, danter Tluses y Puntives da aspité. Te doi tuniei uniral fat lëures y perchël messeran for inò saré la streda per n chert‘ de ëura.

USP - L abunamënt nuef per l trasport publich ie pert de n sistem nuef da nuzé plu saurì. De plu permez a sën, paierà n auter ann chiche se nuzea puech de curieres, ferates y furnadoies publiches. „L prudot nuef se pieta nce per grupes nueves y per mutivé pendolares a tò i mesuns publics nce te si tëmp liede“, à cunedì l assessëur Thomas Widmann (ncuei) n merdi danmesdì, ai 03 de fauré ntan la prejentazion a Bulsan.

USP – I jëuni se nteressea bën de cie che suzed tla vita publica – politica, sce l ti vën nce pità la cundizions aldò. Sota chësc moto à de plu assoziazions di jëuni n culaburazion cun i assessorac provinziei ai jëuni nvià via la scumenciadiva “Nteressà de politica”. La 17 azions per jëuni de duta trëi grupes de rujeneda ie unides prejentedes (ncuei) ai 02 de merz tl Palaz Widmann a Bulsan.

USP – Na sëula cherta per dut l trasport publich tl Südtirol, n sistem plu scëmpl da timbré y tarifes che premia chiche se nuzea de plu di mesuns publics: chëstes ie la seves dl nuef Südtirol-abo che ie unì dat pro dala Jonta provinziela. L assessëur ala mubilità Thomas Widmann prejenterà duman, juebia, i particuleres ntan na cunferënza stampa.

USP – “La ntegrazion de sculeies cun dificulteies garata tres na culaburazion de de plu partner che se tën n cuntat”: cun chësc prinzip de lëur possa la grupa de lëur per ntegrazion scolastica cialé de reviers a 10 ani lëur fat n culaburazion. L prinzip de lëur ie chël de na coordinazion danter la istituzions per arjonjer na bona ntegrazion tla scolines y scoles de duta trëi grupes de rujeneda.