Atualità

USP - Manfred Mölgg à venciù la bedaia de bront dl slalom di campionac dl Mond a Garmisch Partenkirchen. Auguresc dal presidënt dla Provinzia Luis Durnwalder che à laudà la bedaia de Mölgg sciche ncuronazion de na edizion storica di campionac dal pont de ududa dl Südtirol.

USP - Le lingaz dla uma é n valur che ne dess nia ma gnì sotrissé en ocajiun dl dé internazional che le recorda. Na pert de ci ch’i sun é lié al sonn y significat de chësc prüm lingaz ch’i un aldì da pici insö, che à formè nosc pinsier y dè parores a nüsc sentimënc”, scrî l’assessur Florian Mussner en ocajiun dl dé internazional dl lingaz dla uma ai 21 de forà.

USP – Tl 2019 ulëssa la Provinzia de Bulsan deventé l zënter dl nteres culturel de Europa. Deberieda cun i raions dl Nordest dla Talia se anjinien ala candidatura per deventé capitela europea dla cultura 2019. N juebia ai 24 de fauré uniral a Bulsan sotscrì la fundazion dl cumité de candidatura cun vel nota ladina.

USP – I mestieres dl artejanat artistich à purtà bënsté y cualità de vita te Gherdëina. Chisc mestieres pieta mo for na bona basa de furmazion per jëuni che à na bona man artistica. N vënderdi ai 25 de fauré possa duc i nteressei vijité la scola prufesciunela a Urtijëi y se fé n cheder dl nseniamënt che vën pità n auter ann tl cuntest dla reforma dla scola auta.

USP – La Jonta provinziela à udù dant la scoles autes de rujeneda taliana ulache l vën pità na furmazion particulera che reverda la mujiga, sport, rujenedes y alimentazion. Duta chësta spezificazions tl cheder dla reforma dla scola auta, unirà d’autonn pitedes a Bulsan.

USP – L’ena passeda ova la Jonta provinziela damandà miuramënc dl culegamënt de fonins y puec dis do iel stat n’ancunteda di respunsabli dla Telecom cun l presidënt dla provinzia. Ncuei, 14 de fauré, iel unì cunedì de n’acurdanza sun prim pruvedimënc.

USP – La posizion dl presidënt dla provinzia Durnwalder de ne ulëi nia fé pea la festes per i 150 ani dl’unità dla Talia à gaujà truepa polemiches y prutestes. Tla senteda dla Jonta provinziela (da ncuei) dl 14 de fauré, à l presidënt detlarà de ne ne avëi nia mudà minonga: “te chisc 150 ani iel nce stat tëmps ulache nosta populazion se n à fat pea d’uni sort, perchël ne é deguna rejon de fé festa”, nscì Durnwalder.

USP – La lege provinziela sun i juesc de fertuna a paiamënt ie unida purteda da la Suneria costituzionela ajache l Stat ie dla minonga che l sibe si cumpetënza. La Jonta provinziela à dat pro de se lascé ite tl stritoz.

USP – La Jonta provinziela à ti si senteda (da ncuei) dl 14 de fauré dat pro 150 stieres de pratica ntan l instà per jëuni che à finà de studië, chëi che studieia mo y per sculeies dla scoles autes. La dumandes possa unì fates nchin ai 20 de merz.

USP – Cun de plu pruvedimënc uel la Jonta provinziela sustenì l integrazion de persones cun handicap tl mond l lëur. L sustëni dëssa dantaprima jì a bën de 900 persones cun handicap che ne abina nia da lëur.