Atualità

USP – L pericul che la jënt se n vede demez dai luesc ie veramënter da udëi te de plu chemuns dla provinzia de Bulsan. La Jonta provinziela à (ncuei) ai 14 de fauré dat pro de mëter sun n ufize nuef che se cruzië de analisé la situazions singules y de lauré ora soluzions.

USP – Per ruvé tla graduatories de nsenianc tla scoles ladines muessen avëi fat n ejam de ladin dedicà. L proscimo ejam per nsenianc sarà chësta ann ai 21 de merz, n possa se lascé nuté su nchin al plu tert n sada ai 19 de fauré.

USP – I lëures che unirà fai chëst ann per cumedé ca la stazion de Pruca ie unic prejentei dala assessëur Thomas Widmann ai ambolc y reprejentanc di chemuns ujins. Te chësta ucajion iel nce unì analisà i culegamënc dla curieres cun la valedes ntëurvia.

USP – Lies che fej atività tl ciamp dla cultura ladina à chëst ann dat ju de plu dumandes per n cuntribut provinziel. Nchin ala fin de jené à l Ufize per la Cultura Ladina giapà 83 dumandes de sustëni al’atività dla lies. Permez ala mesaria di ultimi ani ie la cumpëida auzeda de 20%. L aumënt dla dumandes desmostra che tla valedes ladines iel ti ultimi ani for de plu lies che fej atività culturela.

USP – La fiera Futurum ne unirà chëst ann nia dedicheda a duta la furmazion dala scolina nchin al’università, ma defin ala reforma dla scola auta. Chësc ie dantaldut de utl per la families de sculeies che muessa nchin ala fin de merz avëi cris ora na scola auta. La terza edizion dla fiera Futurum sarà da udëi dai 17 nchin ai 20 de fauré a Bulsan.

USP – Da d’altonn gnaràl indô pité trëi scores altes a La Ila. Les novitês, les mudaziuns y dötes les informaziuns de ütl por chirì fora öna dles scores vëgn presentades en jöbia, ai 10 de forà tratan na sëra de informaziun tla scora alta da La Ila. I geniturs y düc’ i interessà é invià dales ot da sëra.

USP – La Jonta provinziela ie stata a una che l’università se damande n livel plu aut dla rujenedes per scumencé n studi. “La forza dl’università de Bulsan ie la rujenedes, perchël sustenions i pruvedimënc per auzé l livel de chësc pont de forza” à dit l presidënt dla provinzia.

USP – Cun 110 iscrizions al ejam de rujeneda per zitadins nia comuniteres à la Jonta provinziela (ncuei) ai 7 de fauré fat ora de purté inant la preparazion a na maniera che i ejams possa prësc scumencé. Purempò fajeran l puscibl acioche vënie nce azetà l ejam per la rujeneda tudëscia.

USP – La Jonta provinziela à fat ora de dé ite la candidatura per l cungres de medejina da mont tl ann 2014. L raion dl Südtirol se adateda, nscì l presidënt dla provinzia, drët bën a chësc cungres de inuem mundiel.

USP – La Provinzia de Bulsan ne fajerà ufizialmënter nia pea la festes per i 150 ani unità d’Italia. La dezijion che la Jonta provinziela à tëut ai 7 de fauré (ncuei) reverda l’istituzion provinziela y nia na pruibizion de festejé.