Atualità

USP – I set parcs naturei dl Südtirol giapa pra si ntredes prinzipeles nueva tofles de nfurmazion. Ntan l fin dl’ena se à l assessëur Laimer fat n cheder dla situazion tl parch dla Drei Zinnen.

USP - “Te nosc tëmps ie la pruvocazions sun i monumënc dl fascism per nia” nsci la posizion dla Jonta provinziela n cont dla mpermetuda dl minister talian Bondi de pudëi tò demez reperc dl fascism. “La populazion de rujeneda taliana ne se identifichea nia cun l fascism” à dit Durnwalder, che vëija l tò demez dla pruvocazion de utl per la cunvivënza. L monumënt dla vënta a Bulsan y i ossares sun la sëides dëssa resté, l relief sun l palaz dla finanza y l alpino de Burnech dëssa unì tëuc demez.

USP – L’Università de Bulsan se à sëurantëut la ncëria de valuté ciun nseniamënt universiter tla Talia o oradecà che dëssa unì recunesciù per l bilinguism. La cooperazion danter Provinzia y Università de Bulsan ie unida azeteda (ncuei) ai 31 de jené dala Jonta provinziela.

USP – Do che la Provinzia de Bulsan se ova metù adum cun chëla de Trënt per damandé n sustëni europeich per la stieres jites perdudes tesć la crisa finanziera, à l presidënt Durnwalder (ncuei) do la senteda dl 31 de jené cunedì che l’Union Europea à azetà l dumanda y che l unirà scrit ora n cuncors per patrons de lëur.

USP – La Jonta provinziela à tei si senteda dl 31 de jené (ncuei) scumencià a traté n sistem nuef de abunamënt al trasport publich. N ulëssa pité n sëul abunamënt che vel per dut l raion provinziel a na maniera che sëuraprò al viac che n fej plu suvënz, possel nce unì adruvà per vel viac te n auter raion. I priejes che ne fova nia plu unic tuchei per 15 ani muessa unì auzei. L sistem nuef premia chiche fej plu chilometri cun l servisc publich.

USP – Pra l cënsimënt dla populazion dla provinzia de Bulsan, de utober 2011 uniral adurvà na regulamentazion nueva per la detlarazion dla grupa de rujeneda. La Jonta provinziela à te si senteda (da ncuei) dl 31 de jené dat pro che per la detlarazion a fin de statistica dëssel me unì tëut n cunsciderazion i zitadins de naziunalità taliana che à l di de referimënt la residënza tla provinzia. A chësta maniera giapa i ladins, sciche mëndra grupa de rujeneda, n majer pëis.

USP – Per si prestazion straurdinera y per vester na persunalità de referimënt per dut l Südtirol, à l presidënt dla Provinzia Luis Durnwalder fat i auguresc a Carolina Kostner, vizecampiunëssa de Europa de jadiné artistich. “Kostner y i autri atlec che à venciù bedaies ntan l fin dl’ena desmostra tan inant che n possa ruvé tl sport sce n tën permez y à na tel mentalità da ejëmpl” à dit l presidënt dla provinzia.

USP – L proiet de ressanamënt y mëter adum la scola mesana cun la scola elementera a S. Martin ie unì azetà dala cumiscion tecnica dla Provinzia de Bulsan.

USP – Pra l cunvëni scientifich sun l plurilinguism te scola, l ultima ena a Coira/Chur à la Scola ladina cun si model paritetich giapà gran stima da truep esperc de livel nternaziunel. L cunvëni à purtà truepa ideies nueves y à cuntribuì a miuré y ntensifiché l cuntat danter scola ladina y la ‘Scola auta da pedagogia dal Grischiun’.

USP – Nteressei al lauré te scolina o te scola ladina muessa avëi fat l ejam de ladin per pudëi fé pert dla graduatories. Tl mëns de fauré vëniel pità cursc de preparazion per l ejam che sarà chëst ann ai 21 de merz.