Atualità

USP – I lëures a Bulsan per l spedel nuef de 255.000 metri cubich cun n custimënt de 237 milion de euro va inant drët bën. Per l 2015 fejen cont de finé de frabiché. Chësc ie l bilanz dla vijita dl presidënt la provinzia Luis Durnwalder cun i assessëures Florian Mussner, Richard Theiner y Christian Tommasini, inier prim de setëmber.

USP – L Museum Ladin a S.Martin de Tor prejënta n vënderdi 3 de setëmber dala 6 da sëira si verzon nuef. Dala 7 da sëira uniral prejentà i prudoc dl marcià rëidl che ie da giapé tla ustaria dl Museum.

USP – Doi regions tl’est dla Ruscia fova sun l program de viac dl presidënt dla Provinzia Durnwalder ntan na curta ena. Do l’ancuntedes tla region dl Kamtschatka ie Durnwalder furnà tla region sibirica dl Altai ulache la se tratova de proiec cuncrec de culaburazion tl turism, agricultura, energia y ambient.

USP – La Dolomites da duman abenëura, pizes che passa ora n mer de nibl, ciofs y tieres da daujin: per capì la marueia y la belëza de nosta montes muessen les avëi ududes. Ai 9 de setëmber uniral a S.Crestina giaurì na mostra de fotografies sun la Dolomites.

USP – L stritoz per l cumpëns de avëi abinà Ötzi ie ncuei (30 agost) finà via de fin. L presidënt dla provinzia Luis Durnwalder à sëurandat al aucat de chëi che ova abinà la mumia, Georg Rudolph, n scech simbolich de 175.000 euro. Chësta ie la soma de cumpëns che fova unida fata ora danter i arpadëures dla copia Simon y la Provinzia de Bulsan.

USP - Ai 10 de setëmber 2010 vëniel tl zënter dla scoles autes a Urtijëi metù a jì l Di dla Scola ladina te na forma nueva. L unirà pità na sort de marcià dla ideies, na mostra de “bona pratiches” sun i argumënc dl plurilinguism, dla scienzes y dla criatività. L di dedicà a duc chëi che lëura per la scola ladina unirà giaurì dal presidënt dla provinzia Luis Durnwalder y dal assessëur Florian Mussner.

USP – L’ena che vën uniral metù man cun de plu lëures de asfalt nuef tla valeda de Puster y tla Val Badia. Chiche ie sun streda muessa fé cont che l ie da aspité pra l semafer.

USP - N dumënia ai 5 de setëmber, avisa l anuel de 64 ani dal’acurdanza de Paris, unirà sëurandates la uneranzes dla Provinzia de Bulsan per l 2010. Cun l gran orden al merit uniral tl Ciastel Tirol unerà 12 persunaliteies che se à fat meric particuleres per l svilup dl Südtirol y che ne vif nia tla provinzia.

USP – N sada ai 4 de setëmber uniral giaurì l raion de paussa Bagn Rumestluns a La Val. La funtana de ega minerela pra la ustaria Al Bagn ie unida trasfurmeda te n raion de relax.

USP – Sun si viac tl Kamchatka, tla Siberia, à l presidënt dla provinzia Luis Durnwalder abù si prima ancuntedes istituzioneles: cun l aministradëur dla region russa al nvià via i prim vares per mëter n drova n’acurdanza de cooperazion te de plu ciamps sciche l cumerz, cultura, furmazion, sport y turism, che fova unida sotscrita de nuvëmber a Mosca.