Atualità

USP – “La vela dl cumandant nuef de duc i Schützen de Südtirol y de chël dl Tirol ie na bona ucajion per pensé a na union danter Schützen de ca y de la dl Prëner” dij l’assessëur ala cultura Sabina Kasslatter Mur. L’assessëura nvieia i Schützen a numiné n sëul cumandant per l Tirol y per l Südtirol.

USP – Tla Val D’Aosta se anconta dai prim ai trëi de setëmber reprejentanc de plu mendranzes dl’Europa per n barat culturel y aministratif. L Assessorat culturel dla Region Aosta à chëst ann nvià l Assessorat ladin dla Provinzia de Bulsan a reprejenté la grupa de rujeneda ladina pra l “Festival des Peuples minoritares”.

USP – L Museum Ladin Ciastel de Tor mët a jì n culaburazion cun l Parch naturel Puez-Odles uni merdi ntan l instà n di dedicà ala geologia dla Dolomites. Chësta pruposta à abù gran nteres.

USP - N ann do che l ie unì giaurì la streda de zircunvalazion a S.Crestina mostra la cumpëides di auti che la vën nuzeda de plu che n se ova aspità tla proietazion. Sëuraprò ai auti y mesuns pesoc che passa via l luech, vën na gran pert dl muvimënt a se l dé da chëi che furnea ite y ora de S.Crestina. Purempò passa feter 2/3 de dut l muvimënt tres la zircunvalazion. “N media passa 5.700 auti al di tres la zircunvalazion y nia plu danter la cëses de S.Crestina, chësc cumporta n gran miuramënt dla cualità de vita tl zënter” spiega l assessëur Florian Mussner.

USP – “Se muever zënza auto”. Chësc devënta plu saurì te chëla che possa se nuzé di mesuns de trasport publich a bon priesc y cun gran flessibltà. Gran suzes à la cumbinazion de chertes sciche la Mobilcarad, la museummobil Card o la chertes per i turisc’ che pieta l trasport y ntredes a ativiteies cultureles y de tëmp liede. La bona zifres dà rejon al dipartimënt provinziel ala mubilità che pieta chësta cumbinazion de chertes.

USP – Les trëi ciantarines da La Val, cunesciudes sciche la grupa “Ganes” vif y lëura ti Paejes tudësc y tl’Austria. Per se tenì n cuntat cun la jënt de cësa y mparé a cunëscer d’autri ladins che ie oradecà fejeles pea l proiet dla plata internet „Ladins tl monn“. L assessëur provinziel Florian Mussner à n sëira (19 agost) ancuntà la “Ganes” pra si cunzert tl ciastel Trauttmansdorff a Maran.

USP – La families se nuzea ann per ann for de plu dla puscibltà de mandé la mutans y i mutons plu abenëura tla scolina. Na lege dl 2008 vëija danora la puscibltà de scrì ite i mëndri ala scolina bele cun 2,5 ani. Danter i scric ite per l ann de scola 2010/11 iel tla val Badia 26% de trëi ani y dessot, te Gherdëina iel 32% de chësta età. De cunseguënza devënta l’esigënzes de desferenzië l’ativiteies de scolina aldò dl’età for majeres.

USP – La Jonta provinziela à te si senteda da ncuei (17 agost) dat pro l finanziamënt per slargë y splané la streda provinziela danter S.Martin de Tor y Lungiarü. La proietazion fova bele unida fata dan n valgun ani sun la basa de vedli priejes. Sun pruposta dl assessëur Florian Mussner à la Jonta provinziela dat pro l custimënt nuef de ndut 925.959 euro, proietà aldò dla tarifes atueles.

USP – La Jonta provinziela à dat pro l sistem nuef de museré l davani dla persones per scemplifiché la prestazions provinzieles. Te si senteda d’agost, amez a la paussa da instà, à la Jonta meneda dal vizepresidënt Hans Berger nce tëut dezijions che reverda l svilup turistich di chemuns y de se paré contra l Guviern a Roma.

USP – Sun cënc de plates, atualisedes doi iedesc al ann y dat ora da na sëula istituzion: cun chësta carateristiches se prejënta l’edizion nueva dl liber di cursc data ora dal Ufize provinziel per la furmazion. Ai 20 de agost sarà l’abineda de cursc dan man.