Atualità

USP – Per abiné culaburadëures che unissa ntan l inviern a lauré ti hotiei y tla ustaries à la repartizion provinziela per l lëur metù a jì deberieda cun la lia di osc’ HGV na borsa dl lëur pra l’Adria. La borsa metuda a jì a Lignano Sabbiadoro y per l prim iede nce a Grado à abù suzes.

USP – Feter duta la cunferënzes vën aldidancuei fates cun na prejentazion multimediela. Co che n possa prejenté cun suzes adurvan l program de computer “Powepoint”, vëniel nsenià da pert dl Ufize provinziel per media audiovisuei te n curs che scumëncia ai 21 de utober. La dumandes per l curs che ie debant, vën bele piedes do.

USP – Tl Istitut Ladin Micurà de Rü vëniel ncuei (mierculdi 8 de utober) prejentà l liber sun la cianties populeres tla valedes ladines dla Dolomites. L se trata de na documentazion de na nrescida scientifica, fata dan 100 ani. La prejentazion a San Martin de Tor scumëncia dala cich domesdì.

USP- Reprejentanc dla trëi grupes de rujeneda che lëura tl ciamp di jëuni ie, sun scumenciadiva di ufizies provinziei per jëuni stai a Oslo tla Norvegia, per mparé a cunëscer de plu manieres de cultura, sustëni, prevenzion y ntegrazion.

USP – L muvimënt di auti a Mühlbach dëssa deventé plu segur cun n sotpassaje y n ncrëusc nuef per arjonjer l luech. Ntan i proscimi mënsc uniral fat i lëures che se damanda nchin mez fauré na desviazion sun na streda provisoria.

Per via de lëures vën la streda de Puster a S. Laurënz sareda da chësc mierculdi 8 de utober nchin ala fin de nuvëmber. Ntan chësc tëmp puderan furné ntëur tres desviazions.

USP – Te si senteda da ncuei (06 de utober) à l Guviern provinziel de Bulsan rujenà dl federalism fischel, dla dates per mprësc’ per l cuatier y de n zënter cumerziel. L presidënt dla jonta à dopro prejentà i ponc de majer nteres.

USP – Co che n possa se defënder da virus, iërms o troians tl computer nsënia l Ufize provinziel per media audiovisuei pra n curs ai 29 de utober a Bulsan. La iscrizions al curs che ie debant, vën bele tëutes su.

USP – I lëures per fé da nuef l puent dl stradon de Gherdëina a Runcadic va inant drët bën. “Per Nadel nes à la firma Rella segurà de finé l puent nuef” spiega l assessëur ai lëures publics.

USP – Studënc che va a na scola auta o che fej cursc a tëmp plën tla scoles prufesciuneles y che stà ora de familia de albierch, giapa cuntribuc dala Provinzia. La dumandes possa unì dates ju nchin ai 16 de utober.