Atualità
-
De plu lueges dai auti pra la stazion dla ferata a Pruca
USP – L’acurdanza per mené y mantenì la lueges dai auti y pertes dla streda cun i parëies contra la fuera pra la stazion dla ferata a Pruca ie unì sotscrita ncuei, 25 de juni. A una iesen ruvei danter l assessëur ai lëures publics Florian Mussner, l assessëur ala mubilità Thomas Widmann, reprejetanc di chemuns nteressei y i respunsabli dla ferata dla RFI, la Rete Ferroviaria Italiana.
-
Butëighes daviertes nce da sëira
USP – Te 29 luesc dl Südtirol vën la butëighes d’instà nce tenides daviertes da sëira. Nsci sarala nce ti trëi luesc de Gherdëina. Cun l “shopping da sëira” vëniel dat mo plu vita a zëntri di luesc y dla ziteies ntan la sajon ciauda.
-
Sëurandà i lëures pra l puent a Runcadic
USP – L puent a Runcadic, dan ruvé a Urtijëi devënta plu segur. L Ufize provinziel per apalc à pudù sëurandé i lëures per cumedé l puent sëura l Derjon de Gherdëina. L puent unirà nce slargià per la streda dala rodes.
-
Emigrei y intergrazion: prejentazion di pruvedimënc ai 27 de juni
USP – La situazion di emigrei tl Südtirol n generel y cuestions de lëur ie ultimamënter unides analisedes dal Guviern provinziel de Südtirol che à riesc laurà ora pruvedimënc. Chisc unirà prejentei dal presidënt Luis Drunwalder n vënderdi ai 27 de juni a Bulsan.
-
La Provinzia uel deplù cumpetënzes y unfat scioldi
USP - La Jonta provinziela de Bulsan uel de plu cumpetënzes da Roma. Do si senteda de ncuei (lunesc 23 de juni) à l presidënt Durnwalder spiegà che l ti piterà a Berlusconi de sëurantò plu cumpetënzes judan nscila l Stat a sparanië. Da Roma ulëssen perchël che i cuntribuc ne vënie nia scurtei. Tla senteda de chëst’ ena iel danterauter nce unì tratà la cunsulënzes de esperc, l custimënt dla sanità, la grandëzes dla tlasses de scola y na mudazion al proiet dl tunel dl Brëner.
-
Dumandes per l pest ala viles de valuta
USP - Per l prim iede à l Assessorat ladin dla Provinzia de Bulsan chëst ann scrit ora n pest per la viles tla Val Badia che ie de gran valor per la cuntreda tipica tl cheder dl respet per nosc ncësa. N vënderdi ai 27 de juni ie l ultimo di per de jù la documentazion per fé pea l cuncors.
-
Publicazion dla lege sun la veles provinzieles
USP - Duman uniral publicà tla plata ufiziela dla region la leges n cont dla veles provinzieles 2008 y l pachetl de leges provinzieles tlamedes “omnibus”. La leges nueves jirà n drova l di do la publicazion.
-
Curieres ntan l instà 2008 for plu saurides
USP – Cun i orars dla curieres da d’instà ie l servisc unì slargià ora y miurà. Da n sada ai 21 de juni va n drova na lingia de nuviteies che ie unides damandedes da truep zitadins y da cunsorc de turism.
-
Turism tl Südtirol ntan l ann 2006/07
Chisc dis iel unit ora la publicazion dl Istitut provinziel de statistica (ASTAT) sun l turism tl Südtirol ntan l ann 2006/07. L vën tlo analisà la vela de albierch n cont dla tipologia y dla cumpëida di liec deberieda cun la dumanda dl marcià n cont di turisc’ unic adalerch y dla cumpëida dla nuetes afitedes. Sciche pont zentrel dla publicazion de statistica iel unì paredlà i cunsorc de turism n cont de strutures y di servijes defrënc.
-
Durnwalder a Bruxelles: aleanza danter regions per aministré la montes
USP – L presidënt dla provinzia Durnwalder à fat udëi ite a passa 300 reprejentanc dla regions dla Comunità Europea che se à abinà tl parlamënt a Bruxelles dla maniera de aministré la montes. L cumité dla regions dla Union Euorpea à ncuei (19 de juni) dat pro l proiet sun l daunì di raions da mont tl’Europa. “É purtà dant a inuem dla regions n pachetl de pruvedimënc y é damandà ala Cumiscion europea de nvië via na politica spezifica per la montes”, à dit Durnwalder. Ala discuscion sun chësc argumënt à nce tëut pert l cumissèr dla UE ala regions Danuta Hübner.