Atualità

I ombolc sciöche rapresentanc di comuns lità dala popolaziun é l’organism ofizial de rapresentanza di Ladins incër le grup dl Sela. Ai podarà s’incuntè autonomamënter te na Conferënza permanënta di ombolc ladins y por proiec te ciamps desvalis podarài se joè de assoziaziuns y istituziuns raionales. Chësc é ci che é gnü fat fora en lönesc, ai 19 de setëmber 2005 a Balsan pro na incuntada danter le Presidënt dla Provinzia Luis Durnwalder, so colegh trentin Lorenzo Dellai y le Presidënt dla Provinzia de Belun Sergio Reolon, l’assessur Florian Mussner y düc i 19 ombolc dles cinch valades ladines.

USP - En lönesc, ai 19 de setëmber 2005 a Balsan gnaràl baié dl organism de rapresentanza di Ladins incër le grup dl Sela. Le Presidënt dla Provinzia Luis Durnwalder à invié so colegh trentin Lorenzo Dellai y le Prësident dla Provinzia de Belun Sergio Reolon, l’assessur Florian Mussner sciöche ince düc i ombolc dles cinch valades ladines a se sentè adöm y rajonè sön chësc argomënt.

USP - Por le mëteman dl ann de scora nü gnaràl ince en chësc ann invié ia en vëndres, ai 9 de setëmber 2005 le Dé dla scora ladina a La Ila. I argomënc zentrai che gnarà tratà te chësta ocajiun é la scora ladina y sües particolaritês sciöche ince le percurs de formaziun y la cualité dla formaziun a livel nazional y internazional. Implü él ince sön le program n discurs da pert dl assessur por la scora Florian Mussner y dl intendënt Roland Verra.

USP - L’Istitut Cultural Ladin “Micurà de Rü” se dà jö cun le mantegnimënt y la promoziun dl lingaz y dla cultura ladina. Tignin cunt dles propostes dles assoziaziuns culturales de Gherdëna y dla Val Badia à la Junta provinziala nominé, en lönesc ai 29 d’agost 2005, le Consëi d’Istitut nü dl Istitut Cultural Ladin “Micurà de Rü”. “L’Istitut à na funziun determinanta no ma por le mantegnimënt mo ince por le svilup de nosta cultura ladina” à dit l’assessur Mussner.

USP - En lünesc, ai 29 d’agost 2005 à la Junta provinziala sön domanda dl assessur Florian Mussner nominé danü la Consulta provinziala dla jonëza ladina metüda adöm da diesc comëmbri. “La Consulta resta trëi agn te süa inciaria y ara à le compit de rapresentè i interesc dla jonëza ladina a livel provinzial” à alzè fora l’assessur Mussner che à sambëgn ince tut l’ocajiun por rengrazié la Consulta da denant por l’impëgn y la colaboraziun tratan i trëi agn passà y ti à aodè tröp suzès te so laûr al gremium nü.

USP - “Identité, profescionalité y svilup“, insciö à inom le convëgn che vëgn invié ia ai 6 de setëmber 2005 te Sëlva. Danter atri sarà presënc le presidënt dla Provinzia Luis Durnwalder, so colegh dal Trentin Lorenzo Dellai, l’assessur Florian Mussner y l’assessur dla Regiun Veneto Oscar De Bona.

USP - L’assessur al personal Thomas Widmann, l’assessuria ala scora taliana Luisa Gnecchi, l’assessur ala scora todëscia Otto Saurer y l’assessur ala scora ladina Florian Mussner à arjunt inier na acordanza cun le Consorz di Comuns por ci che reverda le laûr da puzenè les scolines. Les colaboradësses pedagogiches ne puzenëia nia plü da sëgn inant cun le contrat nü. Le Provinzia mëss aumenté la cuota di cosc’ de gestiun dles scolines che ara ti dà anualmënter ai Comuns, él gnü dit dala sentada. I Comuns mëss organisé le laûr da puzenè.

USP - En mertesc, ai 2 d’agost 2005 s’à la IIª Comisciun provinziala por la sconanza dla contrada cun a ce Adriano Oggiano dè jö cun proiec por le sport da d’invern. La Comisciun à dè so bëgnstè por proiec ti comuns de Ciastel y de Corvara.

Ai 11 d’agost 2005 dales 9.00 inant gnaràl assegné tl’Intendënza ladina, Bindergasse 29, a Balsan i posc de rode y lëdi por l’insegnamënt tles scores ladines tratan l’ann de scora 2005/2006.

L’Intendënza dla scora ladina à inier mertesc, ai 12 de lugio 2005 lascè alsavëi i resultac di ejams de stat 2005 tles scores altes ladines. Ma un n candidat à arjunt le mascimo resultat.