Atualità

USP - Tl’Intendënza ladina él sëgn dan man le calënder provisore por i ejams de concurs dles insegnantes y di insegnanc dles scores ladines. “La maiù pert di ejams scric sarà ti dis incër les festes da Pasca” à dit l’ispetur dla scora ladina Lois Ellecosta. Dui ejams gnarà bele tignis ala fin de forà, y plü avisa “Fotografia y grafica publizitara” y “Pitöra”.

USP - Chisc dis mostra Barbara Tavella instalaziuns video y imajes danter realté y finziun tla Galaria Prisma a Balsan. Ara é la pröma artista che à davagné le pest „Flus d’aisciöda“ metü a jì dal Assessorat ala cultura ladina. La mostra é gnüda inaudada tratan le fin dl’edema che é stè dal assessur ladin Florian Mussner, dala presidënta dla Lia di artisc de Südtirol Helga von Aufschnaiter y dal presidënt dla iuria Josef Irsara.

Deache al mëss gnì fat laûrs cun prescia sön la strada dla Val Badia (SS 244) restaràra stlüta ai 9 y ai 10 de forà 2005 de nöt y ai 14 de forà 2005 domisdé por döt le trafich.

USP - Cun dui intervënc ô la Provinzia miorè la segurëza sön la strada statala 242 dla Val Gherdëna tla localité de Pontives. Ti proscimi dis gnaràl scrit fora i laûrs por mëte jö rëis de proteziun cuntra la tomada de peres y por fà sö sis. Le secundo intervënt é la costruziun de na galaria de 180 metri.

USP - Barbara Tavella, la pröma artista che à davagné le pest „Flus d’aisciöda“, mët fora sües operes tla Galaria Prisma a Balsan. La mostra gnarà inaudada en vëndres sëra, ai 4 de forà 2005 y restarà daverta cina ai 19 de forà.

USP - Sce ara se trata de problems d’amur, conflic cun i geniturs o problems de dependënzes tol les jones y i jogn che é te dificoltês sovënz sö contat cun le zënter de consulënza „Young&Direct“. Chilò poi rajonè de sü problems y de sü fistidi, magari tres telefonn o e-mail, restan anonims, y gnon aconsià da porsones espertes. I assessurs ala cultura Florian Mussner, Sabina Kasslatter Mur y Luigi Cigolla s’à fat na idea dl laûr te chësc zënter inier jöbia, ai 27 de jenà.

USP - Dan da püch à la Junta provinziala sön domanda dl assessur ladin Florian Mussner aprovè le plann anual por le sostëgn ala cultura dl grup linguistich ladin por l’ann 2005. Chilò ne tómel nia ma ite i contribuc por manifestaziuns, por la promoziun dla mendranza linguistica y por la colaboraziun cun i Grijuns, mo ince i contribuc ai artisc, ales lies y ai media sciöche ince i contribuc por investiziuns tl ciamp cultural.

Tles vijinanzes dl tunel sön la strada statala da Pruca te Gherdëna vëgnel dötaurela fat laûrs por assiguré le crëp. Cun l’aiüt de na gru de 60 metri él incö, ai 26 de jenà, gnü slarié fora, sön 4500 metri cuadrac, rëis por tignì sö les peres. “I sun stà sforzà a reagì debota ajache al ê tomè jö n gran tòch de crëp. Tratan à la Repartiziun provinziala sorvisc strades feter bele stlüt jö i laûrs”, à dit l’Assessur competënt Florian Mussner.

OSP – “I messun recordè, tignì i edli daverc y agì cun cosciënza y responsabilité, por che de te’ tragedies ne sozedes nia ciamò n iade”, à sotligné i trëi assessurs ala scora Otto Saurer, Luisa Gnecchi y Florian Mussner en gaujiun dl 60ejim aniversar dla liberaziun dl ciamp de conzentramënt de Auschwitz che toma doman, ai 27 de jenà 2005. En chësc dé vëgnel recordè les vitimes dl nazism.

USP - Tles prömes trëi tlasses dles scores elementares ladines déssel gnì injuntè ales 26 ores d’oblianza al’edema atuales trëi ores de materies a lîta. Tla cuarta y cuinta tlassa dla scora elementara dess les scolares y i scolars avëi 27 ores d’oblianza al’edema y trëi ores de materies a lîta. Tles scores mesanes ladines déssel indöt gnì pité 32 ores d’insegnamënt de 60 menüc; chësc corespogn a 35 unitês da 50 menüc da sëgn y trëi unitês de materies a lîta. La Junta provinziala à aprovè incö, lönesc, sön domanda dl Assessur ladin Florian Mussner chëstes normes diretives por realisé la reforma dla scora .