Atualità

USP - Ai 14 de dezëmber 2004 à le Presidënt dla Provinzia Luis Durnwalder invié i ombolc dles döes valades ladines a Neustift por rajonè dla promoziun dles mendranzes linguistiches. Al ê ince presënt l’assessur provinzial Florian Mussner. I argomënc prinzipai de discusciun é stà i proiec de promoziun dl lingaz y dla cultura ladina y ince la nominaziun de n comitê de coordinaziun. Al é gnü fat fora de realisé i proiec de promoziun adöm ala Provinzia. Do intenüda cun les provinzies interessades y cun le Consëi di Ministri déssel gnì metü sö n comitê de coordinaziun formè dai ombolc di comuns ladins.

Tratan i mëisc da d’invern gnarà la strada dla Val Badia indô daverta a döt le trafich; chësc bele da indoman, jöbia ai 16 de dezëmber 2004 cina ai 28 de merz 2005. I laûrs de costruziun dla strada va inant aladô dl plann preodü.

USP - N juebia, ai 9 de dezëmber 2004, à l assessëur ladin Florian Mussner ancuntà reprejentanc dla istituzions di Grijons dla Svizra a Müstair. Te chësta ucajion à i partezipanc rujenà dla puscibltà de na culaburazion tl ciamp dla cultura. Nce l Vizepresidënt dl Cunsëi Regionel Luigi Chiocchetti, l diretëur dl ufize ala cultura dla Provinzia de Trënt Marco Viola y l Presidënt dla Union Generela di Ladins dla Dolomites Giovanni Pellegrini, a tëut pert a chësta ancunteda.

Sciöche preodü dala lege mëssel gnì fat controi sön i contribuc culturai conzedüs dala Provinzia. Le 6% di caji vëgn ciarà do plü avisa dal’aministraziun provinziala: chisc gnarà trac fora a caje ai 15 de dezëmber 2004 te na sentada publica.

USP - Tratan i mëisc da d’invern vëgn la Strada dla Val Badia SS 244 indô daurida al trafich.

Tla sentada da en mertesc, 30 de novëmber 2004, à la IIª Comisciun provinziala por la sconanza dla contrada cun a ce Adriano Oggiano, diretur dl Ofize provinzial por la sconanza dla contrada, aprovè proiec ti comuns da Corvara, La Val y Ciastel.

Tratan les edemes che é stades à tröpa jënt interessada tut pert ales sëres de letöra y discusciun cun auturs ladins y esperc fora dl monn leterar ladin metüdes a jì a Urtijëi y a La Ila. Le Departimënt por la Cultura ladina che à organisé chëstes sëres de leteratöra se desmostra contënt dl suzès arjunt y programëia porchël ciamò val’ sëra de leteratöra ladina.

Por plü de 100 insegnanc dles scores ladines se tràtera sëgn d’imparè por i ejams. De merz 2005 metarà man i pröms ejams scric dl concurs ordinar por insegnanc dles scores elementares, mesanes y altes. Chësc é stè comuniché dal Ispetur dla scora ladina Lois Ellecosta.

Arac positifs da pert dla IIª Comisciun provinziala por la sconanza dla contrada por i proiec de costruziun de strades tl Comun de Mareo y de realisaziun de na deponüda por i ros dl implant da fà nëi tl Comun da Corvara.

Les lies culturales ladines po presentè domanda de contribut por ativitês culturales ala Provinzia cina ai 31 de jenà 2005 à comuniché l’Assessur ala cultura ladina Florian Mussner. I formulars por fà domanda de contribut gnarà portà dant dal Ofize cultura y scora ladina te döes sëres d’informaziun ai 6 de dezëmber 2004 a Urtijëi y ai 10 de dezëmber 2004 a San Martin de Tor. Dötes les porsones interessades é dër bel inviades.