Atualità
-
Ejaminazions per l’azetanza de proiec de furmazion ESF
USP – Per giapé n’azetanza definitiva de „proiec ESF“, proiec de furmazion sustenì dal Fond soziel europeich, iel dant debujën di ejaminé plu avisa. La dumandes per l ejaminazions che vën scumëncedes de juni, muessa unides dates jù nchin an n vënderdi de chëst’ ena, ai 28 de mei tl Ufize provinziel „ESF“.
-
Anjeniëi per cualifiché la furmazion ti luesc
USP – 22 ulenteres fej da d’ansciuda 2003 l curs „Cualificazion dl lëur de furmazion ti luesc“, metù a jì dal Ufize provinziel per la furmazion. Da permó à l assessëura per la cultura, Sabina Kasslatter Mur pudú sëurandé tla calonia de Bulsan l atestat de avëi fat chësta furmazion.
-
L assessëur Mussner n cont dl di mundiel per l svilup culturel - duman 21 de mei
USP – „La cultura ladina dëssa unì mantenida y giapé lerch per se svilupé inant – tl medem mumënt iel nce debujën de sustenì l barat cun d’autra cultures dl Südtirol y dl’Europa“. Chësc ie l pensier che l assessëur ladin Florian Mussnser porta dant n ucajion dl di mundiel per l svilup culturel de duman, numinà dala UNESCO.
-
L Jëuf de Frea ie inò daviert
USP - Ncuei domesdi, juebia 20 de juni ie l Frea inò daviert ntan dut l di. Nsci vëniel fat al savëi dal Servisc provinziel per la stredes.
-
Udienzes dl Ufize provinziel per l artejanat
Tl’ena danter l 24 y l 28 de mei 2004 tën i culaburatëures dl Ufize provinziel per l artejanat udienzes tla sëntes destachedes.
-
L assessëur Mussner tën dur sun l paiamënt di proietanc
USP – L assessëur ai lëures publics Florian Mussner se à ncuei mierculdi, 19 de mei, ancuntà cun rapresentanc di architec, ingenieres, geometri y agronomes per rujené sun l paiamënt de proiec per lëures publics. La Jonta Provinziela à per chisc caji da permò dat ora n regulamënt nuef cun chël che i proietanc ne nie nia a una. L assessëur Mussner à detlarà de ulëi tenì dur pra l sistem de calculazion nuef.
-
La streda dla Val Baia vën l fin dl’ena giaurida ai auti
USP – La streda dla Val Badia unirà n sada y dumëia 22 y 23 de mei giaurida ai auti y la curieres, nscì la urdenanza dl assessëur ala stredes Florian Mussner. Ntan chësc fin dl’ena uniral a S. Lenert de Badia fat na festa dla Diozeja de Bulsan – Persenon n unëur de San Ujep da Oies.
-
De plù lëures per miuré la stredes de Gherdëina
Ast -Sun la streda de Gherdëina vëniel laurà te cater luesc. Trëi lëures ie unic metui man da Pruca ite y un sota Plan de Gralba. „La segurëza sun streda ie nce cualità de vita“, à dit l assessëur ala stredes Florian Mussner y nscì cëlen di ti ruvé do al bujën de cumedé ca stedes te duta la Provinzia. Al mumënt iesen tl lëur de purté inant passa 430 proiec per l miuramënt dla stredes dl Südtirol.
-
L proiet dal utia Clark ne n' ie nia unì azetà
USP – Ndut ie 24 proiec unic tëui tres pra la senteda dla sgonda cumiscion per la defendura dl’ambient de chëst’ ena. L presidënt Adriano Oggiano y si culaburadëures à dat l bënsté sun 19 proiec. Vel nfurmazion sëuraprò ulëssa la cumiscion mo giapé jian sun l post a ti cialé plu avisa ala situazion. L ne ie nia unì azetà l proiet dla utia Clark sun Frea.
-
Durnwalder anconta l presidënt nuef dla Union Generela di Ladins.
USP – L presidënt nuef dla Union Generela di Ladins dla Dolomites, Nani Pellegrini se à ncuei merdi, 18 de mei, ancuntà cun l presidënt dla Provinzia Luis Durnwalder. Deberieda cun l assessëur ladin Florian Mussner iel unì rujenà te n tlima sarëinn sun l sustëni dla cultura ladina y di media. L’idea de dé ala Union Generela la cumpetënza de na istituzion cun duvieres aministratives ne ie nia unida azeteda dal presidënt Durnwalder y dal assessëur Mussner.
