Atualità
-
Udienzes dl aucat populer
Tl’ena danter l 2 y l 6 de fauré vëniel dat l’ucajion de ji a rujené cun l aucat populer che tën udiënza te de plu luesc.
-
Degun liber de manutenzion per sciaudamënc sota 35 kW
Usp – A defrënzia de duta l’autra pert dla Talia, muessa l liber de manutenzion per mplanc de sciaudamënt me unì tenì pra na capazità de 35 chilowatt nsù. Nsci vëniel fat al savëi dal ufize provinziel contra l meldefuech.
-
Truepa dumandes per lauranc da ora dl’UE
Usp – Da n lunesc possen tl ufize dl lëur dé ju dumandes de aprovazion per l lëur ntan la sajon y nce per tëmp indeterminà per zitadins da ora dl’Eropa. „Davia che l Südtirol posssa me ti dé da lëur a puëc per n tëmp indeterminà, iel te chësc cajo trueps che fej dumanda“, nsci l ditetëur dl Ufize provinziel per l lëur, Helmuth Sinn.
-
Frabiches tl ann 2002 (Astat)
La cubatura tl Südtirol ie tl ann 2002 auzeda de +40,1% pra la frabiches nia abitatives y nce de 15,9% pra la cëses ulache l vën abità laite. L volum à rjont i 4.735.660 m3 per la frabiches nia abitatives y 2.010.344 m3 per la cëses abitatives. L volum dl lëures finei via ie stat de 4.180.996 m3 che fej ora n aumënt de 8,1 % permez al ann dant.
-
Svilup dla populazion tl 3. Trimester 2003 (Astat)
La populazion dl Südtirol cumpëida ala fin de setëmber 2003 470.195 persones y ie cresciuda permez al timester dant de 747 persones. Tl terzo timester 2003 à la cuota di nasciui arjont 11,7 nascites vives sun 1.000 abitanc. La cuota di morc fej ora 8,1 sun 1.000 abitanc. Ntan i mënsc de lugio, agost y setëmber 2003 se à maridà 604 per, de chisc l 49,0% te dlieja y i autri 51,0% n zevil.
-
L Forum per lëures publics tl internet
Usp – Duta la nfurmazions sun l Forum per Lëures publics y si cumëmbri ie sën nce tl internet sun la plates dla Provinzia. I cumpunënc de chësc Forum per Lëures publics ie unic numinei ntan l ultim instà, la nceria da presidënt à sëurantëut l Assessëur ai lëures publics Florian Mussner. Di duvieres dl Forum fej nce pert l mëter jù de linies per la nterpretazion y l mëter n drova dla normes ududes dant per i lëures publics tl Südtirol.
-
Dumandes per cuntribuc culturei nchin ai 2 de fauré
L vën lecurdà che l 2 de fauré ie l ultim di per dé jù la dumandes de cuntribuc per la cultura ladina per l ann 2004.
-
Udienzes dl ufize per i artejans
Tl’ena danter l 26.01.2004 nchin ai 30.01.2004 tenirà i culaburadëures di ufizies provinziei per l artejanat udienzes tla sëntes destachedes.
-
Rapresentanc di diretëures anconta Mussner
Usp – Scumenciadives per la scola y la furmazion te chësta legislatura ie stai i argumënc al zënter de n’ancunteda danter l Assessëur ala scola ladina Florian Mussner y Josef Duregger cun Anton Senoner, rapresentanc di diretëures.
-
Di de lecord ala vitimes dl nazism ai 27 de jené
Usp – Per l cuarto iede uniral n merdi ai 27 de jené lecurdà tla Talia la vitimes dl rejim nazist. Tla scoles dl Südtirol uniral tenì n menut de chiet y riflescion per chësc avenimënt. „Nce nëus duc che vivon tla pesc, libertà y giustizia dasson tenì n mënt la vitimes dl rejim nazist“, scrij i trëi Assessëures ala scola Otto Saurer, Luisa Gnecchi und Florian Mussner te n comunicat.
