Atualità
Dezijiuns dla IIª Comisciun provinziala por la sconanza dla contrada
Tla sentada da en mertesc, ai 12 d’aurì 2005 à la IIª Comisciun provinziala por la sconanza dla contrada dè so bëgnstè por la costruziun de n lift da cater posc a Santa Cristina y de na strada d’azès o de na strada forestala te Mareo.
Aladô dl bëgnstè dla IIª Comisciun provinziala por la sconanza dla contrada po la sozieté dai lifć „Mo.PA GmbH“ a Santa Cristina te Gherdëna fà sö n lift da scagns a cater posć da Monte Pana sön Monte Seura. L’implant a cabines nü che tolarà le post dl lift da scagns atual arà na lunghëza de 1580 metri y gnarà sostignì da 19 pilastri. Ćina śëgn menâ le lift vedl indöt 1200 schiadus al’ora sön Monte Seura. „Chësc numer dess gnì mantignì anfat inće sce le lift nü à la capazité de portè a munt pordërt 2200 porsones al’ora“ à dit le presidënt dla comisciun Adriano Oggiano. Por ći che reverda la staziun a val mëssel gnì metü dant n miù proiet. “La staziun nöia de presciapüch 400 metri cubich dess gnì sentada ite damì tla contrada incëria. Ara dess almanco en pert gnì costruida sot tera y gnì fata sö por ejëmpl de pera y curida jö cun n tët vërt” arata Oggiano. Te vigni caje vëgn la staziun a val vedla trata jö. Sciöche cauziun por la costruziun dl lift ô la IIª Comisciun provinziala por la sconanza dla contrada 100.000 euro. La material che gnarà ćiavè fora por fà sö le lift dess gnì desćiarié, do intenüda cun l’autorité forestala, sön la pista Monte Seura B. Ara se trata indöt de presciapüch 7500 metri cubich de tera. Lascian jö le material sön la pista dai schi se sparagnon incër 400 iadi cun le camion, dij Oggiano. Inće por la desćiaria de material à la comisciun stabilì na cauziun de 5.000 euro. Cun la costruziun dl lift gnaràl inće realisé n sotpassaje por la strada por ti rové pormez ales ćiases sön Monte Pana. La comisciun é dla minunga che i mürs de sostëgn por le sotpassaje dess ester manco lunć de sciöche ai é sön le proiet y inće gnì fać sö a na manira che dà manco al edl. Por chisc laûrs à la IIª Comisciun provinziala por la sconanza dla contrada fissé na cauziun de 10.000 euro. Do n surapost fat en vëndres che é stè à la IIª Comisciun provinziala por la sconanza dla contrada tut la dezijiun che la strada forestala „Cian Ross“ te Mareo che condüj pro l’implant da jì söpert dal medemo inom po gnì slariada y slungiada. Le tru dess deventè presciapüch 600 metri plü lunch aladô dl proiet dla vijinanza da Al Plan. „Ti posć olach’al gnarà spostè material mëssel gnì inverdì do che i laûrs é gnüs stlüć jö” à dit le presidënt dla comisciun Oggiano.UV
