Incuntada danter le Presidënt dla Provinzia Luis Durnwalder y le presidënt nü dla Uniun Generela di Ladins
USP - En jöbia, ai 21 d’aurì 2005 à le presidënt nü dla Uniun Generela di Ladins dles Dolomites Michil Costa incuntè le Presidënt dla Provinzia Luis Durnwalder. Te na conversaziun lungia y daverta él gnü baié dla posiziun dla Uniun Generela, dla promoziun dla cultura ladina sciöche ince di massmedia ladins.
Presidënt Durnwalder y CostaPro la incuntada da inier ti à Michil Costa portè dant y splighé al Presidënt dla Provinzia Luis Durnwalder i punć plü importanć che é sön le program dla uniun culturala suraregionala che ël rapresentëia. Al ti à inće presentè na ligna de proieć che la Uniun oress mëte a jì en gaujiun di 100 agn dla Uniun Generela; por la realisaziun de chisc proieć ti à le Presidënt Durnwalder impormetü le sostëgn dla Provinzia tan inant ch’al é poscibl. N ater tema dla conversaziun é stè le reconoscimënt dla Uniun Generela sciöche gremium suraordiné aladô dla lege de cornisc statala por les mendranzes nr. 482 dl 1999. Le Presidënt Durnwalder à refusé n reconescimënt politich dla Generela cun la delegaziun de inćiaries aministratives. La Uniun dess indere se dè da fà por süa inćiaria culturala por chëra ch’ara é n partner de referimënt dër stimé, s’à tut a dì Durnwalder. La rapresentaziun politica di Ladins resta indere n compit dla Provinzia y di comuns competënć tles valades ladines, à dit Durnwalder. La Provinzia oress cherié na conferënza de ombolć o n gremium de ombolć y rapresentanć di comuns sciöche istituziun permanënta; te chësta dess i comuns ester rapresentà te na manira proporzionala al numer de abitanć ti comuns desvalis, à splighé Durnwalder. Baié él inće gnü sura i media ladins. Durnwalder é dla minunga che le foliet edemal “La Usc di Ladins” dess ti dè ćiamò plü importanza ai argomënć che reverda la cultura y le lingaz ladin y sambëgn inće contignì informaziuns d’atualité por i Ladins. Te vigni caje déssera restè n medium independënt y nia lié ala politica de n partì, à sotligné Durnwalder. Por ći che reverda la RAI ladina à le Presidënt dla Provinzia intenziun de se dè da fà canch’ara jarà de renovè i contrać danter la RAI, la Provinzia y le Presidium dl Consëi di ministri por arjunje n prolungiamënt dles trasmisciuns ladines y por che les strotöres internes vëgnes conformades a chëres di grups linguistics talian y todësch.
