Atualità
L’assessur Mussner: „Tosc na professöra de ladinistica tl’Université da Porsenù“
USP - L’Université lëdia de Südtirol ti dess ince jì adincuntra ai bojëgns dl grup linguistich ladin. L’assessur ladin Florian Mussner à baié cun le presidënt dl’Université Friedrich Schmidl y cun Theodor Riffesser, responsabl dla Repartiziun ladina tl’université, de na professöra de ladinistica che dess gnì metüda sö tla Faculté de Sciënzes dla Formaziun da Porsenù. Implü él ince gnü rajonè de n proiet de plurilinguism tles scolines y scores ladines.
Tla incuntada da inier dl assessur Mussner cun Schmidl y Rifesser à l’assessur sotrissé ch’al ti sta dër a cör na professöra de ladinistica tla Faculté de Sciënzes dla Formaziun. Insciö podess le setur dla didatica linguistica gnì curì damì y maestres y maestri dles scolines y dles scores elementares di paîsc ladins podess a chësta manira s’arjigné ca miù a so laûr te na scora paritetica ladina. L’Université Lëdia da Balsan ô tosc formulè danü le statut dl’Université. Te chësta ocajiun dess la Junta esecutiva y le Consëi dl’Université gnì metüs adöm. “Cun le statut nü él de gran importanza por nos Ladins che inće le grup linguistich ladin vëgnes rapresentè aladô tl’Université“ à alzè fora Mussner. I rapresentanć dl’Université à impormetü de se dè da fà por rapresentè te na manira adeguada inće i Ladins. Mussner, Schmidl y Rifesser à inće baié de n proiet che reverda le plurilinguism tles scolines y scores de Gherdëna y dla Val Badia y che dess pié ia bele chësc altonn. Ara se trata de analisé la didatica dl insegnamënt di lingac tles scores dles valades ladines. Sön chësta basa déssel spo gnì laurè fora na didatica por l’insegnamënt di lingac che ti va adincuntra al model de scora paritetich dles scores ladines. Chësc podarà spo ester n stromënt de laûr che va debojëgn por les maestres y i maestri dla scolina y dla scora elementara.USP
