Atualità
Presentaziun dl proiet cultural „Tras(se) Nord-Süd“ ai 20 de mà tl Museum Ladin
USP - Tres n barat dess la cultura y l’ert dla Val Badia y dl Ahrntal se rové plü dlungia. Les uniuns culturales „EPL“ dla Val Badia y „KUNSTMYST“ dl Ahrntal é tl laûr de mëte a jì deboriada le proiet cultural „Tras(se) Nord-Süd“. Le proiet gnarà presentè en vëndres, ai 20 de mà 2005 tl Museum Ladin Ciastel de Tor a San Martin. Ilò gnaràl ince tignì l’inaudaziun dla mostra coletiva che alda pro le proiet.
Le proiet „Tras(se) Nord-Süd“ gnarà presentè en vëndres, ai 20 de mà dales 18.00 tl Museum Ladin Ćiastel de Tor a San Martin. Ilò gnaràl inće festejé l’inaudaziun dla mostra coletiva di artisć dla uniun KUNSTMYST Sylvie Riant,Hubert Mair,Wilma Kammerer, David Neuhauser, Kyra Leimegger, Paul S. Feichter, Alois Steger, Robert Engl, Egon Neuhauser, Luis Seiwald y Armin Mutschlechner. Le grup ”Sense of Akasha” fajarà da cornisc musicala. Dui dis dedô gnaràl daurì a Steinhaus la mostra coletiva de vintecater artisć ladins sot al’EPL. I artisć metarà fora sü laûrs tl Kornkasten, tla scora elementara vedla y tl Pfisterhaus tl zënter de Steinhaus. Ara se trata de chisc artisć: Alfred Tavella, Giovanni Rindler, Brigitte Trieb, Walter Dalfovo, Aldo Canins, Albert Mellauner, Pepele Pescollderungg, Franz Irsara, Ursula Tavella, Guido Tavella, Mariana Acuña, Lois Irsara, Hubert Prousch, Gustav Willeit, Silvester Promberger, Raimond Mussner, Margareth Forer, Pire Kastlunger, Franz Kehrer, Lois Anvidalfarei, Maria Pezzedi, Lois Rottonara Rott, Markus Moling y Helmut Pizzinini. Tl cheder dl proiet „Tras(se) Nord-Süd“ se barataràl jö ćina ai 5 de jügn mostres d’ert, sëres de leteratöra, conzerć de sorts desfarëntes de musiga, sëres cun cors y d’atres manifestaziuns culturales. I massmedia é dër bel invià a tó pert ala presentaziun dl proiet „Tras(se) Nord-Süd“ en vëndres, ai 20 de mà 2005 dales 18.00 tl Museum Ladin Ćiastel de Tor, strada Tor 72 a San Martin de Tor.USP
