Atualità
Dezijiuns dla IIª Comisciun provinziala por la sconanza dla contrada
USP - Chësta edema à la IIª Comisciun provinziala por la sconanza dla contrada cun a ce Adriano Oggiano dè so bëgnstè por la realisaziun dla pista “Dantercepies – Panorama” tl comun de Sëlva. Sciuré zoruch é indere gnü le proiet de realisaziun de na pista sön „Ciampinoi“ te Sëlva.
La IIª Comisciun provinziala por la sconanza dla contrada n’à nia dè so bëgnstè por la realisaziun de na pista de coliamënt de 111 metri de lunghëza y set metri de larghëza tl raiun da jì cun i schi “Ciampinoi” a 2200 metri d’altëza tl comun de Sëlva. Insciö à Oggiano argomentè süa dezijiun negativa: “Por la realisaziun de chësta pista fóssel stè debojëgn de fà saltè aposta tòć de crëp y chësc te n raiun olach’an vëiga vigni intervënt sön la natöra.” Implü él preodü sön le plan dles pistes dai schi provinzial la costruziun de n lift nü y porchël foss pö la pista de coliamënt por nia, à dit Oggiano. La Comisciun à indere dè n bëgnstè positif por la realisaziun dla pista “Dantercepies – Panorama” tl comun de Sëlva. Ara se trata chilò de na spersa de presciapüch mez n hectar che aladô de na prescriziun dla Comisciun dess dedô indô gnì inverdida. La pista à ma na lunghëza de 150 metri, mo indere na larghëza de bëgn 450 metri.USP
