Atualità
Museum Ladin: program por les families de lugio y agost
Ti mëisc da d’isté, tratan che i geniturs vijitëia pazificamënter le Museum Ladin Ciastel de Tor a San Martin de Tor po les mitans y i mituns imparè a conësce le Museum te na manira plü adatada a ëi. La pröma vijita organisada por families tl Museum Ladin gnarà tignida en jöbia, ai 7 de lugio.
De lugio y agost pîta le Museum Ladin Ćiastel de Tor vijites organisades por families. Tratan che i geniturs vijitëia cun calma le Museum po les mitans y i mituns danter 4 y 7 agn gnì lascià a personal spezialisé che ti cunta stories y liëndes dles Dolomites, ti spliga te na manira scëmpla y interessanta la mostra permanënta y ti sta dlungia tratan ch’ai śüga y fej dessëgns por aprofondì les tematiches tratades. Chësta scomenciadia vëgn metüda a jì vigni jöbia domisdé, dales 15.00 ales 17.30 ai 7 de lugio, ai 14 de lugio, ai 21 de lugio, ai 28 de lugio, ai 4 d’agost, ai 11 d’agost, ai 18 d’agost y ai 25 d’agost 2005. Por tó pert mësson se prenotè deache le numer di partezipanć é limité. An po s’informè y se prenotè pro le Museum Ladin, Ćiastel de Tor sot al numer de telefonn 0474 524020.USP
