Atualità

Trafich | 11.11.2005 | 15:46

I laûrs por le proiet de Punt de Fer é gnüs assegnà

Chisc dis él gnü fat n vare important por ci che reverda i laûrs de costruziun de n ater tòch dla strada dal Val Badia de gran importanza, y plü avisa dl tòch danter Punt de Fer y Pedraces. L’Assessorat ai laûrs publics ti à surandè i laûrs ala dita de costruziun Oberosler da San Laurënz che metarà man cun i laûrs da d’aisciöda dl 2006.

Bel plan pêl che chësc proiet de gran importanza nia ma por rajuns economiches, mo dantadöt de segurëza, pois gnì realisé. Ara se trata de n laûr che va assolutamënter debojëgn y che mëss porchël gnì realisé cun prescia; le punt che dess gnì fat sö danü é te condiziuns precares, tandeplü deache sovënz pàssel ćina 6000 mesi de trasport, à sotligné l’Assessur Florian Mussner. Bele tl 2000 êl gnü fat n stüde de fatabilité por na varianta dla strada statala dla Val Badia tl raiun de Punt de Fer (presciapüch dui chilometri dan Pedraces, da gnì da Bornech ite). Le pröm proiet laurè fora odô danfora cosć de indöt 19.750.000.000 de lires. Por rajuns de cosć à chësc proiet preliminar gnì messü laurè fora ćiamò n iade. Le proiet nü aprovè dala Junta provinziala mët man presciapüch 2,4 chilometri a nord dla localité Pedraces tla Val Badia y passa tres la costa dl crëp cun n tunel. La strada esistënta roda incër le crëp fajan na ota dër strënta. Le tunel nü à na lunghëza de 422 metri. Cun n punt a dui ćiamps de na lunghëza de 57,7 metri passa spo la trassa sura la Gran Ega atraversan la strada statala esistënta y se colian spo pro la pröma ota cun la strada da śëgn. Deache tratan la costruziun dl tunel sciöche inće tratan düć i laûrs sön chësc tòch messaràl gnì garantì la zircolaziun dl trafich, jaràl debojëgn, por rajuns de lerch, d´amplié la strada pro le portal a nord. Chësc comporta danter ater ch’an po pormò mët man cun i laûrs da d’aisciöda. Sc’an metess bele man da laurè dan Nadè spo rovésson te n tëmp caraterisé da n gran trafich de sciori y chësc foss n problem. De te’ impedimënć por le trafich ne foss nia da ponsè te chësc tëmp, à alzè fora Mussner. Le tëmp de costruziun é de 600 dis y i cosć amunta a 5,6 miliuns de euro.

UV