Atualità

Scora / Cultura | 09.01.2006 | 11:20

Iscriziuns ales scolines dai 16 ai 21 de jenà 2006

Les iscriziuns ales scolines ladines por l’ann 2006/07 gnarà fates tl’edema dai 16 ai 21 de jenà. Tla scolina de vigni paîsc gnaràl tachè fora y comuniché les dates y i orars plü avisa. Al podarà gnì scrit ite i mituns y les mitans che compliarà i 3 agn cina ai 31 de dezëmber 2006. I nasciüs de jenà dl 2004 podarà gnì scric; ite sce al sarà lerch assà.

L’Intendënza y la Direziun dles scolines ladines à fat fora le terminn por l’iscriziun al ann de scolina 2006/07. Tl’edema dai 16 – 21 de jenà 2006 podarà i geniturs di mituns y dles mitans che compliarà i 3 agn ćina la fin de dezëmber 2006 i scrì ite tla scolina de so paîsc. I pici nasciüs de jenà dl 2004 podarà gnì scrić ite tan inant ch’al sarà ćiamò lerch. L’orar y i dis dles iscriziuns por vigni paîsc gnarà lascià al savëi plü avisa y tacà fora te vigni scolina.

Sön le tó sö mituns y les mitans te scolina él vigni singul Consëi de scolina che tolarà la dezijiun dan le 7 de forà 2006. Al gnarà inće fat listes de aspetanza te chi caji che al ne po nia gnì tut sö atira düć i mituns y dötes les mitans.

Indöt él 17 scolines ladines, te vigni paîsc, por Corvara y Calfosch él öna na scolina, Runcadic y Sureghes à inće na süa scolina, le paîsc de Urtijëi n’à 2, 1 n’él a Sureghes y 1 a Runcadic. Indöt él gnü tut sö por l’ann de scolina 2005/06 avisa 750 mituns y mitans tla Direziun ladina. Indöt él 100 danter maestres, colaboradësses pedagogiches y sucudiëntes che se tol sura dla formaziun, dl’educaziun y dl’assistënza te caji de bojëgns particolars di pici tla scolina de entrames les valades de Badia y Gherdëina.

USP