Atualità
Dé dla memoria: por dì de “NO” al’intoleranza raziala y ala violënza
Ince tles scores de Südtirol gnaràl recordè ai 27 de jenà cun le Dé dla memoria les vitimes dl nazism y dl fascism. L’assessuria y i assessurs ala scora de Südtirol Luisa Gnecchi, Otto Saurer y Florian Mussner ô ince se dè da fà por promöi na scora olache jogn y jones respeta i dërc dla porsona y va cuntra vigni forma de estremism.
Le 27 de jenà vëgn recordè sciöche “Dé dla memoria” inće tles scores de Südtirol y te de plü zëntri de formaziun.
Chësta iniziativa ne dess dantadöt en chësc ann nia ma ester na repetiziun o n rit de oblianza. Recordè chësc Dé dla memoria ô dì recordè la shoah y les tragedies che le nazism y le fascism à gaujè al’umanité cun sües ideologies de superiorité de na raza y cun sü proieć criminai de desdruziun de massa.
Te nosta provinzia olach’al convir de plü grups linguistics mëss chisc temesc rové ite te scora sciöche tematiches educatives che se destira fora tla colauraziun danter scolars y scolares, personal insegnënt y geniturs por podëi portè früć che döra tl tëmp.
Les notizies dles ultimes edemes nes à insigné ch’al ti mëss gnì dè tröpa atenziun a chisc fenomenns inće te Südtirol por che l’educaziun te scora fejes süa faziun.
Cun la cosciënza de chisc fać da öna na pert, orunse dal’atra pert inće laldè cun sodesfaziun les tröpes iniziatives che de plü scores mët a jì tl vers dla sensibilisaziun cuntra le sënn razial. Sciöche assessuria y assessurs ala scora de Südtirol orésson mët laprò inće nosc impëgn por ne desmentié nia ia, mo por recordè, por eduché jones y jogn sciöche generaziuns nöies, por i portè a na reflesciun che vais sot tl comportamënt y che dëides da jì cuntra vigni forma de estremism y de xenofobia, por promöie la cultura dla toleranza y dla pêsc y por combate la violaziun di dërć umans y dla dignité dla porsona.
Nes recordan les parores de Primo Levi che à instës porvè l’esperiënza di ćiamps de conzentramënt, orunse nes mëte cuntra dötes les formes de estremism che se basëia sön la sëi do podëi, la forza, la tëma y le sënn.
L’assessuria y i assessurs ala scora de Südtirol
Luisa Gnecchi Otto Saurer Florian Mussner
UV
