Atualità
I laûrs de costruziun por le proiet de Punt de Fer po mëte man
Chësta edema che vëgn metaràl man i laûrs de costruziun dl tunel y dl punt tl raiun de Punt de Fer tl comun de Badia.
“Spostan la strada y realisan n punt nü pol gnì miorè de cotan les carateristiches tecniches dla strada sciöche por ejëmpl la pendënza, le radius dla ota y la larghëza y insciö pol inće gnì garantì na majera segurëza sön chësc tòch de strada” à dit l’assessur por i laûrs publics Florian Mussner. I laûrs metarà man ai 19 d’aurì. “Chësc terminn é gnü fat fora deboriada cun i comuns dla Val Badia por limité i problems de trafich ch’al podess gnì a s’al dè tratan chisc dis de festes da Pasca.”Le proiet de costruziun reverda le tòch de strada presciapüch 2,4 chilometri a nord dla localité Pedraces. Al vëgn odü danfora n tunel che passa tres la costa dl crëp. La strada esistënta roda incër le crëp fajon na ota dër strënta. Le tunel nü arà na lunghëza de 422 metri. Cun n punt a dui ćiamps de na lunghëza de 57,7 metri passarà spo la trassa sura la Gran Ega atraversan la strada statala esistënta y se coliarà spo pro la pröma ota cun la strada da śëgn.
I laûrs de costruziun vëgn realisà dala dita de costruziun Oberosler Cav. Pietro AG da San Laurënz. I laûrs gnarà a costè 5,6 miliuns de euro y messarà gnì portà a termo anter 600 dis, sciöch’al sta scrit tl contrat.
Tratan i laûrs de costruziun vëgnel garantì che i auti po passè s’anuzan dla strada esistënta. L’injinier Gustav Mischì dl ofize provinzial Strades nord-ost é responsabl dl proiet y di laûrs.
UV
