Atualità
AP Mussner: „Renforzè i sforc d’integraziun tles scolines y tles scores elementares“
USP - L’Assessur Provinzial Florian Mussner s’à ti ultimi dis fat n’idea dl insegnamënt d’integraziun tles scores dles valades ladines. Dantadöt tles scolines y tles scores elementares déssel gnì ciarè deplü a n’integraziun bunoria de mituns y mitans cun dificoltês, arata l’Assessur Provinzial, do avëi baié cun les maestres de sostëgn y cun pedagoghes. Mussner à laldè l’engajamënt da pert dles maestres y dles pedagoghes, sciöche ince dl grup de laûr por l’integraziun tles scores ladines.
„Le bilanz por ći che reverda l’integraziun tles scores ladines y tles scolines é positif, ći che é dantadöt mirit dl engajamënt dles maestres y dles pedagoghes“, dij cun plajëi Mussner. „Mituns y mitans cun handicap ne dess nia gnì metüs te tlasses speziales, mo ëi dess imparè adöm a atri mituns y mitans, ajache chësc arichësc döta la tlassa“, de chësc é l’Assessur Provinzial sigü.
Mussner à ciafè tröc impulsc dales discusciuns cun les maestres de sostëgn y les pedagoghes. „Por le dagnì dess i sforc por n’integraziun bunoria te scolines y scores elementares, gnì potenzià, a na manira che inće mituns y mitans plü pici / piceres s’integrëies bun tla comunité“, à dit l’Assessur Provinzial por i ladins. Da s’audè é inće, aladô de Mussner, na colaboraziun danter les scolines y la scora y danter les tlasses desvalies te scora, por fà che i passaji ne sides nia problematics por i mituns / les mitans. Aladô dl’Assessur Provinzial é la colaboraziun cun i geniturs de gran importanza y chësta podess ćiamò gnì potenziada. Mo inće i maestri y les pedagoghes podess adorè plü gonot sostëgn. Por ëi messéssel ester la poscibilité de na supervijiun, insciö Mussner.
Le grup de laûr por l’integraziun tles istituziuns de formaziun dess, aladô de Mussner, se dè inant da fà por l’otimalisaziun dl’integraziun. L’Assessur Provinzial à en chësta ocajiun rengrazié por le laûr intensif y profescional de gran importanza de chësc grup.
USP
