Atualità
Kangaroos ladins de fé conc
AS – Per l cuncors de fé conc “Kangaroo dla matematica” ie unic premiei cin sculeies ladins. 8.000 sculeies dala elementera nchin ala scola auta à fat pea l cuncors per la scoles ladines y tudësces dla Provinzia de Bulsan.
Avisa 754 sculeies à fat pea l cuncors de fé conc. Danter la undesc categuries ie trëi sculeies de Urtijëi y doi de Al Plan de Mareo unic premiei dal ntendënt ala Scola Ladina Roland Verra. Ai sculeies ti fovel unì metù dant 30 dumandes cun cin respostes. Te 75 menuc messova ëi pona crì ora na resposta.
Tla categuria per la terza tlas dla scola mesana à venciù Damian Senoner de Urtijëi cun 120,25 ponc. Tla medema categuria à si cumpanies de tlas Alex Walpoth y Elena Alton arjont l cuarto y cuinto plazamënt. Danter i plu jëuni ie i sculeies de Al Plan stai stersc. Philipp Pedevilla ie segondo dla cuinta tlasses elementeres y Mario Obwegs, cuarto dla prima tlasses dla scola mesana. Ai prim cinch de uni categuria ti iel unì sëurandat n diplom y n liber de conc adatà al età.
L nteres per l cuncors “Kangaroo de fé conc” ie for majer y à chëst ann, tl ann europeich dla matematica arjont n record nuef tla Provinzia de Bulsan. Dantann ova mo fat pea 5.200 sculeies, chëst iede iesen ruvei daujin ai 8.000 partezipanc.
La premiazion dl cuncors de fé conc ie unida tenida n mierculdi ai 14 de mei tl Palais Widmann a Bulsan. Te chësta ucajion à l ntendënt ala scola Ladina Roland Verra rujenà dl bujën de junté tl nseniamënt na cultura de co ruvé a na soluzion de problems. La promozion dla matematica ie n bon var de chësc viers. La sëurandata di pesć ie unida tenida deberieda cun l ntendënt ala scola tudëscia Peter Höllrigl y Marta Herbst Spöttl, ispetëura per la matematica y la scienzes natureles.
L Cuncors de fé conc ie nasciù tl’Australia. Tl 1978 fovel unì nvià via l ‚Australian Mathematics Competition’. Tla Franzia iel pona plu tert unì sëurantëut chësta scumenciadiva che ie i ani do unida purteda inant te duta l’Europa.
AS
