Atualità
Spedel de Burnech: i lëures va inant drët bën
USP – Per via dla puecia lerch y per miuré la tecnica vën restruturà y ngrandì l spedel de Burnech. I lëures va inant drët bën. Chësc à pudù cunstaté l assessëur ai lëures publics Florian Mussner deberieda cun l assessëur ala sanità Richard Theiner. La sëntes dl servisc de prim aiut y dla reabilitazion di mëndri ie bele finedes.
“Cun chësc lëur de ngrandimënt ulons ti unì ncontra ala jënt dl raion ntëur Burnech y dla Val Badia per ti pité n spedel cun la nueva njinies y saurì da adurvé” nscì l assessëur ai lëures publics, Florian Mussner. “L ie de gran mpurtanza cialé dla cualità, ajache l spedel miurà dëssa tenì per i proscimi 20 ani”, à sorissà l assesssëur ala sanità Theiner. Tramedoi aministradëures ie cuntënc de co che va inant i lëures. Pra la vijita ai laudà i respunsabli a Burnech de co che sibe i lëures y nce l servisc dl spedel vede inant bën deberieda. Burnech fova n cont de modernisazion mo restà n pue dovia, ma sën iesen tl lëur de giapé na strutura proieteda bën y nce frabicheda bën, à dit l diretëur dl raion de sanità Hans Willeit.
Ti ultimi ani iel for de plu unì sentì l bujën de restruturé l spedel y de strutures sëurapro. La proietazion per la pertes nueves à fat la grupa de architec „Dejaco&Leitgeb&Benko“ de Persenon, per la restruturazion interna, l studio „Strata“ de Genova.
La restruturazion y l ngrandimënt dl spedel vën de ndut a custé 80 milion de euro. Nchin a śën an frabicà per 15 milion. Bele fineda ie la pert de prim aiut ulache la Crëusc Blancia y i Judacrëp à si sënta. Nce la pert per la reabilitazion di mëndri tl cuinto partimënt dla vedla cësa y la pert ulache l vën menà adalerch materiai y da maië, ie bele finedes. La garasc sota tiera dëssa vester njenieda per l fauré che vën. Al mumënt iesen tl lëur de fé su la strutura multifunzionela ulache l giaperà lerch l servisc psichiatrich y psicologich cun nce l servisc per la malaties de dependënza y na stazion cun 50 liec per la cures che dura plu giut. Chësta strutura multifunzionela dëssa unì giaurida tl 2011 y ntant vëniel nce fat su la strutura de aministrazion. Per la restruturazion dla cësa prinzipela cun cater trac, iel udù dant cin ani de lëur. La ncëria per chisc lëures muessa mo unì sëurandata. Tlo se tratela dantaprima de miuré l servisc de prim aiut y la pert ulache l vën fat la operazions.
Te n cin ani, canche n fej cont che i lëures sarà finei aran a Burnech n spedel cun tecniches plu modernes spartì su sun 37.000 metri cuadrac de plu. L ngrandimënt fej ora 130.000 metri cubich.
as
