Atualità
1.000 cëses tlima – uneranzes
USP – Feter degun proiet tl Südtirol ne à abù tan suzes sciche chël dla cësa tlima. L assessëur al ambient Michl Laimer à do sies ani che ie unì nvià via l proiet, bele pudù premië la milejima cësa tlima tl Südtirol.
Sun terassa dla cësa provinziela 11, la sënta dl assessorat per l ambiënt, nstëssa una dla majera cëses tlima dla provinzia, ie stata palch dla uneranza dla milejima cësa tlima. L assessëur Laimer deberieda cun l diretëur dl’agenzia cësa tlima Norbert Lantschner à pudù premië i fredesc Mutschlechner dl luech Salcherhof a Raisca (Reischach) per la milejima cësa tlima tla provinzia.
“Ulon scrì dant l standard dla cësa tlima per frabiches nueves ajache a chësta maniera pudons judé cuncretamënter a smendrì l cunsum de energia y straverdé l tlima”, nscì l assessëur Laimer. Dal’autra pert vëniel da pert di patrons dla cëses tlima dit che l sté bën y l sparanië energia à na gran valuta.
La statistica mostra su che 87 cëses tl Südtirol à do na restruturazion arjont l livel dla cësa tlima C, 92 cëses la categuria B+, 577 la categuria B, 154 la zertificazion A. Mo n miëur livel à arjont 64 tla categuria A+, na dessëina l livel cësa tlima d’or y 14 nchinamei la cësa tlima or+. Duta chësta cëses deberieda sparania trëi milions de litri de gasuele al ann che fej ora 100 camions dal gasuele al ann, nscì Laimer.
L sparani de gasuele ie unì prejentà te na forma drët figurativa. 14 barijiei da 200 litri mostra su l consum al ann de na cësa mesana cun 130 metri de spersa. La cësa tlima C ciafieia cun 800 litri de consum, la cësa tlima d’or nchinamei cun 100 litri. La scrita de trëi milion sta per l gasuele sparanià. N balon cun la scrita 6.000 à simbulisà la tones de anidrida de carbonium sparanieda.
as
