Atualità
Dala Jonta provinziela dl 9 de juni
USP – Te si ultima senteda à l Guviern provinziel de Bulsan danterauter tratà la cuestion che l ti vën vendù l auto a chëi che avisa cun massa alcol tl sanch. N ie tl lëur de la mëter a ji che jëuni possa bele ji pra moster dan avëi 16 ani. Pra i lëures publics dëssel unì adurvà de plu lën da tlo. Dan 10 ani ova la Provinzia sëurantëut la stredes dl stat.
Avisé do avëi bu alcol
La jonta Provinziela de Bulsan ne ie nia a una co che l vën tratà chëi che furnea cun l’auto cun massa alcol tl sanch. “Son sambën da chëla che l ne daussa nia unì furnà cun l’auto do avëi bù massa alcol y on nstësc nce bele fat pruvedimënc. L ie drët che l vën fat cuntroi, suvënz y nce cuntroi sciorfes, ma perchël che un à 1,5 promile tl sanch ne possen nia bel riesc ti vënder l auto”, à dit Luis Durnwalder te cunferënza stampa. N muessa tenì cont che jënt adrova l auto per ji sun l lëur y nia uni luech dla provinzia ne possen arjonjer cun i mesuns publics. La Jonta provinziela fej perchël na lëtra de prutesta al guviern a Roma y ai parlamentares da tlo se damandan na mudazion ala lege. Durnwalder à dit che l muessa unì desferenzià sce n vën abinei l prim iede, l segondo o sce n à bele gaujà na desgrazia.
Furmazion tl artejanat
L guviern provinziel ie tl lëur de se la fé ora cun i aministradëures a Roma co che la ie cun l duvier de ji a scola pra i artejans. La Provinzia ulëssa che n possa bele deventé lerneri riesc do la scola mesana, l stato dij che n muessa ji a scola nchin a 16 ani. Ntant iesen ruvei a una che jëuni possa bele deventé lerneri riesc do la mesana sce i va ala scola prufesciunela y fej nce ëures de cultura generela. La Provinzia à śën fat la pruposta che l dëssa unì scrì dant almanco 12 enes de scola tl prim ann, 9 enes tl segondo y terzo ann, pona 5 o 7 enes de scola prufescionela tl cuarto ann da lerner. L Stato dij che nchin ai 16 ani ne possa i lerneri nia unic udui sciche lauranc y ne possa nce no unì paiei aldò. Aldo de Durnwalder muessa śën i patrons de lëur se la fé ora cun i sindacac tant che l dëssa unì paià nchin a 16 ani.
Davani dla families
N cont di pruvedimënc per ti unì ancontra cun l davani ala families, fovel l’ena passeda unì dit che l ne possa nia vester che l ie mo families che davania manco de mile euro netto al mëns. L presidënt Durnwalder à prejentà la situazion tla Provinzia nstëssa ulache dla nuef categuries de paiamënt, giapa i dependënc dla categuria plu bassa 1.045 Euro netto al mëns. Leprò a Durnwalder mo juntà che ël se damanda da Roma che chëi che davania puech dëssa nce pudëi paië demanco chëutes.
Permez a d’autra regions iel tl Südtirol bele unì fat truep à juntà Drunwalder. Per la mprejes de produzion an bele smendrì la chëuta IRAP. Sun un n pont perzentuel che la Provinizia à la cumpetënza de mudé, ie unì tëut jù mez per duc plu la puscibltà de no paië l auter mez sce n ne pea nia do cuntribuc dala Provinzia per cin ani.
L priesc dl strom dala SEL vën a sel de aldo dla produzion, la spartizion y 10% de variabla. Chisc 10 % ie bele unic adurvei per ti unì anconta ala families. Mplù a la SEL azetà la dumanda dla Provinzia de fé cundizions spezieles per la families.
Pra la pert dla chëuta sun l davani IRPEF che ti va ala region, an tlo da nëus nia metù su mo velch leprò. Te d’autra 11 regions an mo juntà dal 0,9 nchin al 1,4% y perchël possa chëla region śën lascé do na pert che tl Südtirol ne ie nianca unida metuda su. Nce per la chëuta ICI sun l prim cuatier ova bele gran pert di chemuns tëut demez chësta chëuta dan che la fossa unida tëuta demez dal stato.
Parlamënt di jëuni
Sciche udù dant dala cunvenzion di paejes dl’Elpes iel unì metù a jì n parlamënt di jëuni. I ultimi doi ani se à chësc parlamënt ancuntà a Dispruch, chëst ann saral a Maribor tla Slovenia. Tl ann 2009 iel unì dat pro dl fé tl Südtirol, plu avisa a Maran.
Lën da tlo pra strutures publiches
La Provinzia uël sustenì la produzion dl lën da tlo tla strutures publiches. 42% dla spersa de dut Südtirol ie bosch. Te n ann crëscel do 900.000 metri cubich de lën y l vën taià 550.000 metri cubich. Acioche l ne vën nia tëut tan de leniam da oradecà y nce dal Africa y dala America, iel unì dat pro de sustenì la produzion de lën da tlo. Per nia ji contra la normes dla Union Europea an fat ora che pra lëures publics dëssa unì dat plu ponc a proiec che vëija dant lën zertificà. Chësc vën dai raions tlo ntëur, ma nce l Südtirol, nscì Durnwalder, à truep lën zertificà.
10 ani stredes ala Provinzia
Dan 10 ani ova la Provinzia de Bulsan sëurantëut la stredes dal ANAS. Sën uelen mustré su che l ie nce unì fat velch cun chësta cumpetënza sëuraprò. “Ulon mustré che ti on nce dat vita a chësta cumpetënza y che i scioldi adurvei ie nce da udëi”, nscì Durnwalder.
Fujion de banches
La Provinzia de Bulsan à la cumpetënza de lascé pro la fujion de banches. A livel naziunel iel udù dant che l muessa unì damandà la Banca d’Italia che cëla do plu avisa i caji singuli. La suneria costituzionela à sun sentënza dit che nce tl cajo de Bulsan muessen se tenì ala dezijion dla Banca d’Italia. Tl cajo dla casses de Karneid-Steinegg, Fié y Dier (Tiers) oven ulù fé na fujion mantenian dal’autra pert la trëi reunions genereles y la trëi direzions. Durnwalder à dit che l ie na cuestion de prinzip y la Provinzia muessa tlo se tenì ala Banca de Italia che ova dit de no ala fujion.
as
