Atualità
Ejames tla scoles ladines
USP - N lunesc ai 16 de juni scumëncia i ejames tla scoles mesanes dla Val Badia y de Gherdëina cun la prova scrita tla rujeneda ladina. L ejam de stat, la matura per la scola autes scumëncia n mierculdi ai 18 de juni.
La majera defrënzia permez a scoles d’autra rujenedes, ie che l ejam per i 222 sculeies dla terza tlasses mesanes tla Val Badia y te Gherdëina scumëncia cun la prova scrita per ladin. L di do, ai 17 de juni vëniel te duta la Talia fat la prova naziunela, na forma de ejam de conc y de talian. Inant jirà l’ena de ejames per i sculeies che fina la scola mesana ai 18, 19 y 20 de juni cun i ejames de tudësch, talian y conc. L’ena uniral fat l ejam a usc. Te Gherdëina iel chëst ann 108 candidac y tla Val Badia 114 tla teza tlasses mesanes.
L ejam de matura unirà tla scoles ladines tenì i medemi dis sciche nce tl’auta scoles. L prim di, ai 18 de juni possen tla scoles autes paritetiches crì ora danter l talian o l tudësch. L di do jirala inant cun la segonda prova scrita aldo dl urientamënt de scola. La terza prova, metuda adum dala cumiscion de ejam, unira fata sun doi dis, ai 23 y 24 de juni. Chësta sarà da fé te chëla rujeneda che ne ie nia unida crissa ora l prim di. L ejam a usc jirà inant aldò dla cumpëida di sculeies. La majera tlas de matura iel chëst ann tla Scola d’Ert a Urtijëi cun 15 candidac. Tla scola Raetia a Urtijëi nen iel 11. La Ila iel tl Lizeum Linguistich 11 sculeies che fajerà l ejam de matura y 10 tl Istitut Tecnich. De ndut iel tla doi valedes ladines 47 sculeies che fajera l ejam per finé la scola auta.
Ntan l instà uniral chëst ann per l prim iede inò metu a ji i cursc per i sculeies dla scoles autes che à vel loces tla singula materies. I ejames per chisc sculeies muessa unì fai nchin ai 31 de agost. Sculeies dla cuinta tlasses che à mo vel loces furmatives possa mpo fé l ejam de matura. Chësta puscibltà vën me plu data chëst ann, aldò dla vedla normativa.
as
