Atualità
30 ani parch naturel Puez-Odles, ai 15 de juni gran ancunteda
USP – Cun na scumënciadiva particulera vëniel n dumënia ai 15 de juni, da pert dl ufize provinziel per i parcs naturei festejà i 30 ani dl Parch Naturel Puez- Odles. Dala Val Badia, Gherdëina y Funes vëniel muet cun jites nchin dala Schlütterhütte ulache l unirà liet na santa mëssa, fat mujiga y pità n programm per mëndri.
Sciche terzo parch naturel dla Provinzia, ie l parch Puez-Odles nasciù l ann 1978. “Sciche dlonch ne ti ova chemuns, paures y patrons de grunc tl prim nia drë crëta a mëter n raion sota defendura” nscì l assessëur cumpetënt Michl Laimer. Cun truepa lezitënza iel stat mesun lauré tla crëta y tl’azetanza dla populazion. Al didancuei vën i parcs naturei udui de gran valor, cossa che se à nce mustrà dl 1999 canche l ie unì ngrandì tulan ite Resciesa. De ndut mesura l parach Puez-Odles śën 10.200 hectar. “L ie stat l prim ngrandimënt de n parch naturel, l ann do fova pona unì ngrandì l parch Trudner Horn y dl 2003 l parch Scilier-Ciadenac”, à dit Laimer.
N dumënia che vën vëniel festejà i 30 ani dl Parch Naturel Puez-Odles cun na jita nchin pra la Schlütterhütte. Nteressei possa nce fe la jita deberieda cun n cumpaniadëur dl parch naturel che mostra y spiega cie che l ie de nteressant da udëi. Pia via vëniel te Funes dala plaza dai auti a Zans, sun Börz y Pares dala 8.30. A Urtijëi vëniel muet dala plaza dai auti dla sentadoia de Resciesa dala 7 da duman. Per rejons de urganisazion vëniel prià bel de se lascé nuté su per la jites ti ufizies de turism a Urtijëi (tel. 0471 777600), a San Martin de Tor (tel. 0474 523175) o nce te Funes (tel. 0472 840180). Per ji a cësa vëniel metù a ji n servisc de trasport che muef dala sies domesdi pra la plaza a Zans y mëina nchin a Urtijëi.
Pra la Schlüterhütte vëniel dala 11.30 liet na santa mësssa, dadedò saral l assessëur Laimer, Robert Messner y Giovanni Mischì i respunsabli dl parch, deberieda cun l diretëur dl ufize provinziel per parches naturei Artur Kammerer a rujené di 30 ani Parch Naturel Puez-Odles. L anuel vën festejà cun spëisa, truepa mujiga, n program per mëndri, liejendes y cuntedes dla Dolomites cun leprò juesc y da pastelné metù a ji dai cumpaniadëures dl parch naturel.
as
