Atualità
Mënder davani soziel: decret publicà
USP – La realisazion di pruvedimënc dla Jonta provinziela per rafurzé la forza de compra ie de n var plu inant. Ai 23 de setëmber iel unì publicà l decret che auza l mënder davani soziel y i cuntribuc per curì la esigënzes primères. Ai 8 de utober jirà la regulamentazion nueva ndrova.
N cont dl mënder davani soziel porta i pruvedimënc dla Jonta provinziela nchin a 100 Euro de aumënt per persones che vif dassëules, nchin a 132 Euro per copies, nchin a 171 Euro per families cun trëi persones y nchin a 207 Euro per families cun cater persones. De ndut possa persones che vif dassëules ruvé a belau 560 Euro, na familia cun doi mutons a ntëur a 1.146 Euro. La some efetiva depënd dal davani dla familia ntiera.
Cun l decret nuef vëniel nce auzà i cuntribuc per l fit y custimënc de cuatier. Auzà vëniel pona nce duta la prestazions sozieles per curì i bujëns primères dla families sciche l maië, l furnimënt, l’igene, l abité y l sciaudamënt.
Do la publicazion dla gazëta ufiziela, jirà l decret ndrova ai 8 de utober. I Servijes soziei puderà a chësta maniera mo de utober paië ora de plu. “L auzé di aiuc soziei ie de mpurtanza per duc chëi che ie tuchei l plu dai priejes plu cëres, sciche la families”, spiega l assessëur al soziel. “Tres l cumpaniamënt di servijes soziei vëniel judà la families nce te situazions de majer bujën”.
as
